اسلام آباد(22 اگست 2025): کراچی سمیت ملک بھر کے لیے ماہانہ ایڈجسٹمنٹ کی مد میں بجلی سستی ہونےکا امکان ہے۔
تفصیلات کے مطابق ذرائع نے بتایا کہ بجلی ایک روپے69 پیسےفی یونٹ سستی کرنےکی درخواست نیشنل الیکٹرک پاور ریگولیٹری اتھارٹی (نیپرا) میں دائر کی گئی ہے۔
سینٹرل پاور پرچیزنگ ایجنسی (سی پی پی اے) نے درخواست نیشنل الیکٹرک پاور ریگولیٹری اتھارٹی (نیپرا) کو جمع کرادی ہے، جس کی 28 اگست کو عوامی سماعت ہوگی۔
درخواست کے مطابق جولائی میں مجموعی طور پر 14.123 بلین یونٹ بجلی پیدا کی گئی۔ اس میں سے 13.666 بلین یونٹ تقسیم کار کمپنیوں کو فراہم کیے گئے، بجلی کی پیداواری لاگت 8 روپے 18 پیسے فی یونٹ رہی۔
جولائی میں پانی سے 40.13 فیصد، مقامی کوئلے سے 10.64 فیصد بجلی پیدا کی گئی، درآمدی کوئلے سے 8.07 فیصد، گیس سے 7.74 فیصد بجلی پیدا کی گئی جبکہ درآمدی ایل این جی 17.26 فیصد جوہری ایندھن سے 9.95 فیصد بجلی پیدا کی گئی ہے۔
ذرائع کا کہنا تھا کہ یکساں ٹیرف سےمتعلق ای سی سی کی پالیسی گائیڈ لائنز کا بھی نیپرا جائزہ لے گی، نیپرا اتھارٹی سماعت کے بعد کمی کا فیصلہ کرے گی۔
واضح رہے کہ ای سی سی نے ملک بھر کے لیے یکساں فیول چارجز ایڈجسٹمنٹ لاگو کرنے کی منظوری دی تھی، کابینہ کی اقتصادی رابطہ کمیٹی نے 19 اگست کو پاور ڈویژن کی سمری منظور کی تھی۔
ای سی سی فیصلے کے تحت بجلی کی قیمت میں ماہانہ ایڈجسٹمنٹ ملک بھر کے لیے یکساں ہوگی، ای سی سی پالیسی گائیڈ لائنز کے تحت ماہانہ ایڈجسٹمنٹ کا اطلاق کے الیکڑک پر بھی ہوگا۔