دہلی: بھارت کے مقبول ترین رئیلیٹی شو بگ باس او ٹی ٹی سیزن 2 کے فاتح ایلوش یادو کو پولیس نے سانپ کے زہر کیس میں گرفتار کر لیا ہے۔
بھارتی میڈیا کے مطابق نوئیڈا پولیس نے گزشتہ روز ایلوش یادو کو سانپ کے زہر کیس میں گرفتار کیا تھا، اُن کی گرفتاری کی تصدیق ایڈیشنل ڈی سی پی نوئیڈا منیش کمار مشرا نے کی تھی۔
رپورٹ میں بتایا گیا کہ گرفتاری کے بعد ایلوش یادو سے تفتیش جاری تھی، شروعات میں تو یوٹیوبر نے سانپ کے زہر کی سپلائی میں ملوث ہونے سے انکار کردیا تھا لیکن آج اُنہوں نے اپنے جُرم کا اعتراف کرلیا ہے۔
View this post on Instagram
پولیس ذرائع نے بتایا کہ ایلوش یادو نے اعتراف کیا ہے کہ وہ اپنی طرف سے منعقد کی جانے والی پارٹیوں میں سانپ کے زہر کا اہتمام کرتے تھے، اُنہوں نے یہ بھی اعتراف کیا کہ وہ سانپ کے زہر کی سپلائی کرنے والے ملزمان سے مختلف ریو پارٹیوں میں ملے تھے اور وہ اب تک اُن کے ساتھ رابطے میں تھے۔
ایلوش یادو کے خلاف وائلڈ لائف (تحفظ) ایکٹ اور آئی پی سی سیکشن 120 اے (مجرمانہ سازش) کی دفعات کا الزام لگایا گیا تھا۔
ایلوش یادو پر یہ الزام بھی عائد ہے کہ انہوں نے اپنی ویڈیو شوٹ میں سانپوں کا استعمال کیا، ان سنگین الزامات کے بعد یوٹیوبر کو گزشتہ روز ہی نوئیڈا کی مقامی عدالت نے 14 روزہ جوڈیشل ریمانڈ پر جیل بھیج دیا۔
View this post on Instagram
واضح رہے کہ اس سے قبل نوئیڈا پولیس نے ایک ریو پارٹی پر چھاپہ مار کر 5 ملزمان کو گرفتار کیا تھا جن میں ایک ملزم کے پاس سے 20 ملی لیٹر زہر ملا تھا۔
اس سے قبل 9 مارچ کو پولیس نے ایلوش یادو اور چند دیگر افراد پر نوئیڈا میں دہلی کے ایک عام یوٹیوبر پر حملہ کرنے کا الزام عائد کیا تھا، مبینہ حملے کی ایک ویڈیو بھی سوشل میڈیا پر وائرل ہے، شکایت کنندہ نے دعویٰ کیا کہ یادو نے ’اس کی ریڑھ کی ہڈی کو توڑنے کی کوشش کی اور اسے جان سے مارنے کی دھمکی دی۔