یو اے ای کی معروف ایئر لائن اتحاد ایئر نے ہالی وڈ کی فلم کی ریلیز کے حوالے سے اپنے مسافروں کو بڑی رعایت دینے کا اعلان کیا ہے۔
تفصیلات کے مطابق متحدہ عرب امارات کی اتحاد ایئر کی جانب سے نئی پیشکش متعارف کرائی گئی ہے جسے ’ناممکن پیشکش‘ کا عنوان دیا گیا ہے جس میں کرایوں میں نمایاں کمی کا اعلان کیا گیا ہے۔
الامارت الیوم اخبار کے مطابق ہالی وڈ کی کامیاب ترین ایکشن فلم ’مشن امپاسیبل‘ کی ریلیز کے حوالے سے اتحاد ایئر نے اپنے ٹکٹوں پر بھی ’ناممکن ڈیلز‘ پیش کرنے کا اعلان کیا ہے۔
رپورٹ کے مطابق ایئرلائن کی جانب سے اس پیشکش کا آغاز 31 جولائی 2023 سے ہوگا جسے 10 ستمبر سے 10دسمبر2023 تک استعمال کیا جاسکے گا۔
ایئرلائن کی جانب سے جاری کرایوں کے حوالے سے بتایا گیا کہ یہ پیشکش محدود ممالک کے لیے ہے۔
امارات سے ممبئی کا کرایہ 895 اماراتی درھم جبکہ نیو دہلی کے لیے 995 درھم ہوگا۔ کوالالمپور کے لیے 2795 درہم جبکہ بینکاک کے لیے 2895 اماراتی درھم ہوگا۔
یورپی ممالک جانے والے مسافر بھی اس پیشکش سے مستفیض ہوسکتے ہیں۔ زیوریخ کے 2445 درھم مقرر کیے گئے ہیں جبکہ بزنس کلاس کے لیے 14995 درھم کرایہ رکھا گیا ہے۔
اتحاد ایئرلائن کے نائب صدر ریونیو ’ایرک ڈی ‘کا کہنا ہے کہ ہم نئی ریلیز ہونے والی ایکشن فلم کے بارے میں بڑے پرجوش ہیں۔ اسی حوالے سے مثالی آفرز پیش کی ہیں اگرچہ اس موسم گرما میں مسافروں کی تعداد کافی زیادہ ہوگی اس کے باوجود مثالی آفرشروع کی ہے۔
اتحاد ایئر کے مسافر اپنے سفر کے دوران جہاز پر مشن امپاسیبل سیریز سے بہتر طور پر لطف اندوز ہوسکیں گے۔ اتحاد ایئر کی جانب سے تمام پروازوں کے مسافروں کےلیے فلائٹ کے دوران مفت چیٹ سروس بھی مہیا کی گئی ہے۔
مسافروں کو ائیرلائن کے مہمان پروگرام میں رجسٹرہو کر وہاں اکاونٹ بنانا ہوگا جس کے بعد وہ فوری طور پر واٹس اپ، بوٹم، میسنچر، وی چیٹ یا دیگر چیٹ پروگرام استعمال کرسکیں گے۔
واضح رہے کہ فلم ’مشن امپاسبل‘ کی بیشتر عکس بندی ’ابوظبی‘میں ہوئی ہے جہاں عرب صحرا ’لیوا‘ اور ’مڈفیلڈ ٹرمینل ایئرپورٹ‘ جیسے مقامات شامل ہیں۔ اس فلم کو ابوظبی فلم کمیشن کے علاوہ مقامی پروڈکشن کمپنیوں کی مدد بھی حاصل تھی۔
فلم کی یہ عکس بندی 2021ء میں ہوئی تھی جہاں مشن امپاسبل کی ٹیم کورونا آنے سے پہلے دو ہفتے کام کرتی رہی۔ یہ پہلی مرتبہ نہیں ہے، اس سے پہلے بھی ٹام کروز اپنی کئی فلموں کی عکس بندی اس ملک میں کرتے رہے ہیں۔ ان فلموں میں مشن امپاسبل سیریز کی ’فال آوٹ‘ اور ’گھوسٹ پروٹوکول‘ شامل ہیں۔