قومی ٹیم کے آل راؤنڈر فہیم اشرف بھی رواں ماہ 25 نومبر کو رشتہ ازدواج میں منسلک ہوجائیں گے۔
قومی ٹیم کے آل راؤنڈر فہیم اشرف کی شادی کا کارڈ سامنے آگیا ہے جس میں مہندی، بارات اور ولیمے کی تاریخ درج ہیں۔
ذرائع کا کہنا ہے کہ فہیم اشرف کی مہندی 23 نومبر، بارات 25 اور ولیمہ 26 نومبر کو ہوگا، شادی کی تقریب نارووال جب کہ ولیمہ کی تقریب پھول نگر میں ہوگی۔
واضح رہے کہ رواں برس فہیم اشرف کی منگنی کی تقریب ان کے آبائی علاقے بھائی پھیرو میں ہوئی جس میں رشتے داروں اور دوستوں نے شرکت کی تھی۔
دوسری جانب ورلڈکپ کیلئے قومی اسکواڈ میں شامل کرکٹر امام الحق کی شادی کی تقریبات کا آغاز 23 نومبر سے لاہور میں ہوگا، امام الحق کی شادی کی تقریبات کے سلسلے میں قوالی نائٹ کی تقریب 23 نومبر کو ہوگی۔
امام کے نکاح کی تقریب 25 نومبر کو طے کی گئی ہے جب کہ قومی کرکٹر کا ولیمہ 26 نومبر کو لاہور میں ہوگا۔