بانی پی ٹی آئی اور تحریک انصاف زمین پر لیٹ جائیں گے، فیصل واوڈا

اسلام آباد: سینیٹر فیصل واوڈ نے دعویٰ کیا ہے کہ آنے والے دنوں میں بانی پی ٹی آئی اور تحریک انصاف زمین پر لیٹ جائیں گے۔

اے آر وائی نیوز سے گفتگو کرتے ہوئے سینیٹر فیصل واوڈا نے کہا کہ فیض حمید کا معاملہ ابھی شروعات ہے ابھی بہت بڑے بڑے بُت گرنے ہیں۔

انہوں نے کہا کہ ٹاپ سٹی کے کیس میں اور بھی کئی نام سامنے آئیں گے، 9 مئی والوں کی پشت پناہی کرنے والوں کا بھی احتساب ہوگا۔

فیصل واوڈا نے کہا کہ فیض حمید کا شمار طاقتور لوگوں میں ہوتا تھا آج انہیں بھی احتساب کا سامنا ہے، جو خود کو آئین و قانون سے بالاتر سمجھتے ہیں انہیں بھی آئین  و قانون کے دائرے میں لانا چاہیے، جو میں نے آج پیشگوئیاں کی ہیں آئندہ مہینوں میں نہیں ہفتوں میں دیکھیں گے۔

یہ پڑھیں: فیض حمید کیخلاف کورٹ مارشل کارروائی شروع، تحویل میں لے لیا گیا

ان کا کہنا تھا کہ فیض آباد دھرنا کیس تو چھوٹا ہے ابھی بہت بڑے کیسز سامنے آئیں گے، سپہ سالار کو مبارک باد دیتا ہوں جو ناممکن تھا وہ بھی ممکن کردکھایا۔

سینیٹر نے کہا کہ آئین و قانون کا نقصان ہو تو ایسے اقدامات ہونے ہی تھے، یہ شروعات ہے ابھی بہت بڑے بت گرنے ہیں، آنے والے دنوں میں ارشد شریف سے متعلق بھی حقائق سامنے آئیں گے۔

فیصل واوڈا نے کہا کہ جو بھی پاکستان کو نقصان پہنچائے گا اب اس کا احتساب ہوگا، سیاست دانوں سمیت چوریاں بچانے والے سب لوگوں کی باری ہے۔