کراچی : تحریک انصاف کے سابق رہنما فیصل واوڈا کا کہنا ہے کہ چیئرمین پی ٹی آئی نے اقتدار کیلئے جو کیا وہ سب سامنے آگیا لیکن اب وہ پھنس چکے ہیں۔
تفصیلات کے مطابق تحریک انصاف کے سابق رہنما فیصل واوڈا نے سابق وزیراعظم کے پرنسپل سیکریٹری اعظم خان کے انکشافات پر اے آر وائی نیوز سے خصوصی گفتگو کرتے ہوئے کہا کہ اعظم خان بند کمرے میں موجود تھے جب سائفر پر بات ہورہی تھی، چیئرمین پی ٹی آئی نےبیانیہ بنایاکہ امریکا نے نکالا پھر باجوہ صاحب نے نکالا، چیئرمین پی ٹی آئی نے اقتدار کیلئے جو کیا وہ سب سامنے آگیا۔
فیصل واوڈا کا کہنا تھا کہ چیئرمین پی ٹی آئی نےاقتدارکیلئےجو کیا وہ سب سامنےآگیا، چیئرمین پی ٹی آئی نے قمرجاویدباجوہ کوکہاتوسیع دیتےہیں پھر انہی کیخلاف بیانیہ بنایا، ذاتی مفاد کیلئے بات کریں گے تو مسائل پیداہوں گے۔
سابق رہنما نے کہا کہ جب سائفرپربات ہورہی تھی تواعظم خان موجودتھے اور میں جانتاتھا کہ وقت آئیگا تو اعظم خان اپنا دفاع کریں گے کیونکہ جب میڈیاکےسامنےہوتےہیں توانسان پھٹ جاتاہے، جب آپ اپنے اقتدار کیلئے کام کریں گے تو تاش کےپتوں کی طرح بکھرجائیں گے، دیکھنا یہ چاہیے کہ ہم نے لانگ مارچ سے حاصل کیا کرنا تھا۔
چیئرمین پی ٹی آئی کے حوالے سے ان کا کہنا تھا کہ مجھے چیئرمین پی ٹی آئی اور انکی پارٹی کا الیکشن اور سیاست میں کوئی کردار نہیں دیکھ رہا، چیئرمین پی ٹی آئی نے جو کیا وہ قانونی معاملات میں پھنسیں رہیں گے، چیئرمین پی ٹی آئی کے دائیں بائیں موجود لوگوں کی خواہش ہے وہ جیل جائیں۔
انھوں نے مزید کہا کہ میٹنگ میں اسدعمر، شاہ محمود، شیریں مزاری،اعظم خان،چیئرمین پی ٹی آئی کی موجودگی نظر آئے گی ، میٹنگ میں ایک دو اور لوگ ہوسکتے ہیں اس سے زیادہ نہیں کیونکہ جب کوئی اپنی انا پر آجاتا ہے تو وہ نشہ انسان کو انسان نہیں رہنے دیتا۔
فیصل واوڈا کا گفتگو کرتے ہوئے کہنا تھا کہ جب آپ وزیریاوزیراعظم ہوں توسیکریٹ ایکٹ کےتحت باتیں نہیں کرسکتے، میں جوباتیں سمجھارہاتھاوہ سب ٹھیک ہوتی جارہی تھیں، چیئرمین پی ٹی آئی قانونی شکنجےمیں پھنس گئے ہیں، پی ٹی آئی اور ان کے چیئرمین کا الیکشن میں کوئی فیوچرنظرنہیں آرہا، الیکشن میں پی ٹی آئی کاکوئی ٹکٹ ہولڈرہی نہیں ہوگا۔
انھوں نے بتایا کہ اعظم خان سائفر کا حصہ ضرور تھے لیکن جب کوئی غیرقانونی کام کرتے ہیں تو چیزیں چھپا لیتے ہیں ، شہزاداکبر بہت سی چیزیں چھپا کر لےگئے ہیں،میٹنگ منٹس بھی چرا کر لےگئے۔
سابق رہنما کا کہنا تھا کہ اعظم خان چھوڑیں ان کےساتھ کوئی بھی نہیں رہےگا، اعظم خان چیئرمین پی ٹی آئی کےسب سےقریبی ساتھی ہیں، جب شکنجہ بڑا ہوگا تو بہت سے لوگ سامنے آئیں گے اور جتنا بھی بڑا جرم ہو جرم جرم ہی ہوتا ہے۔
انھوں نے کہا کہ انسان بہت کچھ سوچتا ہے مگر ہوتا وہی ہے جو اللہ چاہتاہے، کون آسمان پر رہے گا کون زمین پر وہ وقت ہی بتائے گا، کون عرش سےفرش اورکون فرش سےعرش پر جائے گا اب وہ وقت آگیا ہے۔
سابق آرمی چیف کے حوالے سے فیصل واوڈا نے کہا کہ باجوہ صاحب برےآدمی تھےتوانہیں اچھاآدمی کیوں بنادیا، بقول آپ کےباجوہ صاحب نےپنجاب حکومت گرادی، لیکن ان سب چیزوں کے لئےارشدشریف اپناجان گنوابیٹھا۔
سابق رہنما کا کہنا تھا کہ تحقیقات توملک میں70سالوں سےچل رہی ہیں مگرکسی انجام کونہیں پہنچیں، ان سب کالب لباب یہ نہیں تھاکہ وہ الیکشن چاہتےتھے، اس کالب لباب تھاکہ حاضر چیف نہ بنیں پرانے والےبن جائیں، چیئرمین پی ٹی آئی اس کے بعدچاہتےتھے صدارتی نظام کے تحت بادشاہ بن جائیں۔