بھارتی نژاد آئرلینڈ کرکٹ ٹیم کے آل راؤنڈر سیمی سنگھ کا جگر ناکارہ ہو گیا ہے اور وہ اسپتال میں زندگی اور موت کی کشمکش میں مبتلا ہیں۔
غیر ملکی میڈیا کے مطابق آئرلینڈ کے لیے 35 ون ڈے اور 53 ٹی ٹوئنٹی میچز کھیلنے والے بھارتی نژاد کرکٹر موذی مرض کا شکار ہوگئے ہیں۔ ان کا جگر ناکارہ ہو گیا ہے اور وہ گروگرام ایک اسپتال کے آئی سی یو میں زندگی اور موت کی کشمکش میں مبتلا ہیں۔
ڈاکٹروں نے ان کے جگر کی فوری پیوند کاری تجویز کی ہے اور اب وہ اس ٹرانسپلانٹیشن کے منتظر ہیں۔
سیمی سنگھ کے سسر ویندر سنگھ نے مقامی میڈیا سے گفتگو کرتے ہوئے کرکٹر کی بیماری کے حوالے سے کہا کہ ان کے داماد کو کچھ ماہ قبل ڈبلن میں عجیب قسم کا بخار ہوا تھا، جو بار بار اترتا اور چڑھتا رہا، جب بیماری کا پتہ نہ چلا تو انہیں علاج کے لیے بھارت لے آئے تھے۔
انہوں نے بتایا کہ جون کے آخر میں سیمی کو موہالی لایا گیا لیکن تشخیص میں تاخیر اور صحت مزید بگڑنے کی وجہ سے انہیں پی جی آئی، چندی گڑھ میں داخل کروایا گیا جہاں جگر کے فیل ہونے کی تشخیص ہوئی۔
رپورٹس کے مطابق سیمی سنگھ کی اہلیہ اگمدیپ کور نے اپنے جگر کا ایک حصہ عطیہ کرنے کی رضامندی ظاہر کی ہے اور جلد ہی پیوندکاری متوقع ہے۔
بھارتی ریاست پنجاب کے شہر موہالی میں پیدا ہونے والے سیمی سنگھ نے سیمی سنگھ نے پنجاب کی جانب سے انڈر 14 اور انڈر 17 سطح پر کرکٹ کھیلی لیکن وہ انڈر 19 ٹیم میں جگہ نہ بنا سکے۔ اس کے بعد مایوس ہوکر انہون نے ہوٹل منیجمنٹ کی تعلیم حاصل کرنے کے لیے آئرلینڈ کا سفر کیا تھا۔
تاہم کرکٹ ان کی رگوں میں خون بن کر دوڑ رہا تھا۔ اس لیے انہوں نے وہاں کلب سطح پر کرکٹ شروع کی اور 2006 میں ڈبلن کے مالاہائیڈ کرکٹ کلب میں بطور پروفیشنل کرکٹر شامل ہوئے۔
آئرلینڈ کرکٹ میں ان کی کارکردگی نمایاں رہی ہے۔ انہوں نے 2021 میں جنوبی افریقہ کے خلاف ون ڈے سنچری بھی بنائی جب کہ وہ 39 ون ڈے اور 44 ٹی ٹوئنٹی وکٹیں بھی حاصل کر چکے ہیں۔