کراچی(28 اگست 2025): کراچی کی انسداد دہشت گردی عدالت نے پیپلزپارٹی کے رہنما فرحان غنی اور دیگر ملزمان کا 30 اگست تک جسمانی ریمانڈ دے دیا۔
تفصیلات کے مطابق کراچی کی انسداد دہشت گردی کے عدالت نے سرکاری اہلکار پر تشدد کے کیس میں وزیر بلدیات سعید غنی کے بھائی اور چنیسر ٹاؤن کے چیئرمین فرحان غنی و دیگر ملزمان کے جسمانی ریمانڈ میں 3 روز کی توسیع کردی۔
فرحان غنی اور دیگر ملزمان کو آج اےٹی سی میں پیش کیا، وقار عباسی ایڈووکیٹ نے ملزمان کی جانب سے وکالت نامہ جمع کرادیا جبکہ پراسیکیوشن نے مزید ریمانڈ مانگ لیا۔
عدالت نے تفتیشی افسر پر برہمی کا اظہار کرتے ہوئے کہا بتائیں کیا پروگریس ہے؟ ابھی تک کچھ نہیں کیا تو تین دن میں کیا کریں گے؟ کہاں ہے سی آئی اے، ایس آئی یو؟ کیا سب مرگئے ہیں؟ کہاں ہیں سراغ رساں کتے یا وہ مرگئے؟۔
جج نے تفتیشی افسر کی سرزنش کرتے ہوئے کہا مدعی گواہ پیش نہیں کررہا تو کیا تم اس کے ملازم ہو؟ اس کیس کے بعد کیا آپ ڈی ایس پی بن جائیں گے؟ آپ لوگوں کو صرف عام آدمی کو تنگ کرنا آتا ہے، آئندہ سماعت پر ہر صورت پروگریس رپورٹ پیش کی جائے۔
جس کے بعد عدالت نے ملزمان کے جسمانی ریمانڈ میں 3 روز کی توسیع کرتے ہوئے ملزمان کو 30 اگست کو دوبارہ پیش کرنے کا حکم دے دیا۔
https://urdu.arynews.tv/karachi-farhan-ghani-government-official-tortured-footage-24-august-2025/