شبرزیدی کو چیئرمین ایف بی آر مقرر کرنے میں کوئی قانونی رکاوٹ نہیں، فروغ نسیم

اسلام آباد: وفاقی وزیر قانون بیرسٹرفروغ نسیم نے کہا ہے کہ شبرزیدی کی تقرری کی مخالفت کرنے والے عناصر درحقیقت میرٹ کی پالیسی کے خلاف ہیں۔

تفصیلات کے مطابق وفاقی وزیر قانون بیرسٹر فروغ نسیم کا کہنا ہے کہ شبرزیدی کی تقرری کے حوالے سے وفاقی کابینہ کے ارکان میں کوئی اختلاف نہیں ہے۔

انہوں نے کہا شبرزیدی کو ایف بی آر کا چیئرمین مقرر کرنے میں کوئی قانونی رکاوٹ حائل نہیں ہے۔

فروغ نسیم نے مزید کہا کہ شبرزیدی کی تقرری کی مخالفت کرنے والے عناصر درحقیقت میرٹ کی پالیسی کے خلاف ہیں۔

وزیر اعظم، شبر زیدی ملاقات: ملکی مالیاتی نظام سےمتعلق تبادلہ خیال

اس سے قبل گزشتہ روز وزیراعظم عمران خان سے نامزد چیئرمین ایف بی آر شبرزیدی کی ملاقات ہوئی تھی جس میں ملکی معاشی صورت حال سمیت کئی امور پر تبادلہ خیال کیا گیا تھا۔

وزیراعظم عمران خان نے شبر زیدی کو فیڈرل بورڈ آف ریونیو میں اصلاحات سے متعلق اپنے وژن سے آگاہ کیا تھا۔

یاد رہے کہ گزشتہ دنوں وفاقی حکومت نے ٹیکس امور کے ماہرشبرزیدی کو ایف بی آر کا چیئرمین تعینات کیا تھا۔

شبر زیدی ٹیکس امور کے ماہر اور چارٹرڈ اکاؤنٹنٹ ہیں اور وہ 2013ء کے انتخابات سے قبل بننے والی سندھ کی عبوری حکومت میں وزیر بھی رہے ہیں۔