سابق شوہر مجھے اور میں اُن کو ذہنی اذیت دیتی تھی، فریال محمود کا انکشاف

پاکستانی شوبز انڈسٹری کی اداکارہ فریال محمود نے سابق شوہر و اداکار دانیال راحیل سے طلاق ہونے کی اہم وجہ بتاتے ہوئے ذہنی اذیت دیے جانے کا انکشاف کر دیا۔

فریال محمود اور دانیال راحیل 2020 میں رشتہ ازدواج سے منسلک ہوئے تھے لیکن بدقسمتی سے جوڑے کی شادی زیادہ نہ چل سکی اور 2022 میں طلاق پر ختم ہوئی تھی۔

حال ہی میں فریال محمود نے ایک پوڈکاسٹ میں شرکت کے دوران طلاق پر اپنے خیالات کا اظہار کیا اور بتایا کہ طلاق یافتہ ہونے پر معاشرے میں کس طرح کا سلوک کیا جاتا ہے۔

پوڈکاسٹ میں انہوں نے اس بارے میں گفتگو کی کہ کیسے ایک عورت کو طلاق یافتہ کا لقب ملتا ہے اور اس کے والدین کہتے ہیں کہ مر جانا لیکن گھر واپس مت آنا۔

فریال محمود نے کہا کہ ایسے والدین کی سوچ بالکل غلط ہے کیونکہ وہ جس اولاد کو دنیا میں لائے ہیں اس کی ذمہ داری انہی پر عائد ہوتی ہے، طلاق کا مطلب یہ نہیں کہ دنیا ختم ہوگئی بلکہ یہ عورت کیلیے زندگی کی نئی شروعات کا موقع بھی ہو سکتا ہے۔

انہوں نے بتایا کہ میں اپنی گھریلو ملازمہ کو حوصلہ دیتی ہوں جو جسمانی تشدد کے باعث شادی ختم کرنا چاہتی ہے، وہ میرے بہت قریب ہے اور اچھی ہے لیکن اپنی طلاق لینا چاہتی ہے۔

اداکارہ کے مطابق میری اپنی شادی ایک ذہنی اذیت تھی، سابق شوہر مجھے اور میں انہیں ذہنی اذیت دیتی تھی اور بالآخر یہی وجہ تھی جس کے باعث ہماری شادی طلاق پر ختم ہوئی۔