کراچی : وفاقی حکومت نے گرین لائن بس سروس سندھ حکومت کے حوالے کرنے کا فیصلہ کرلیا ، یہ منصوبہ کراچی کے پبلک ٹرانسپورٹ سسٹم کا ایک اہم جزو ہے۔
تفصیلات کے مطابق وفاقی حکومت دسمبر میں گرین لائن بس سروس سندھ حکومت کے حوالے کرنے کا فیصلہ کرلیا۔
جس کے بعد حکومت سندھ نے گرین لائن منصوبے کے آپریشنز سنبھالنے کی تیاریاں مکمل کرلیں ، اس سلسلے میں صوبائی وزیر شرجیل میمن کی زیر صدارت اجلاس ہوا ، جس میں بس سروس کے آپریشنز کا جائزہ لیا گیا۔
اجلاس میں گرین لائن منصوبے کو اورنج لائن سے جوڑنے والے منصوبے پر بھی بات چیت ہوئی، جس کے بعد شرجیل میمن نے منصوبے جلد مکمل کرنے کی ہدایت کردی۔
اجلاس میں جاری آپریشنز، یوٹیلیٹی سروسز اور بس سروس کیلئے سبسڈیز پر بھی بات چیت کی گئی ، صوبائی وزیر کا کہنا تھا کہ منصوبہ کراچی کے پبلک ٹرانسپورٹ سسٹم کا ایک اہم جزو ہے، وفاقی حکومت منصوبہ حکومت سندھ کے حوالے کرے گی۔