احتساب کیا جائے تو جمہوریت خطرے میں پڑ جاتی ہے، فیصل واوڈا

کراچی: وفاقی وزیر فیصل واوڈا نے کہا ہے کہ احتساب کیا جائے تو جمہوریت خطرے میں پڑ جاتی ہے، ن لیگ اور پیپلزپارٹی سے این آر او کرلیں یہ آپ کے بھائی بن جائیں گے۔

تفصیلات کے مطابق اے آر وائی نیوز کے پروگرام ’اعتراض ہے’ میں گفتگو کرتے ہوئے وفاقی وزیر فیصل واوڈا نے کہا کہ ن لیگ اور پیپلزپارٹی کے درمیان مک مکا چل رہا تھا، دونوں پارٹیوں نے ڈیم روکنے کے لیے سازش کی، ن لیگ اور پیپلزپارٹی نہیں چاہتیں کہ ڈیم بنیں۔

وفاقی وزیر نے کہا کہ 20 سال سے یہی کہہ رہے ہیں ن لیگ اور پیپلزپارٹی ایک ہیں، دونوں پارٹیاں ایک دوسرے کا ساتھ دیتی رہی ہیں، ن لیگ کو کچھ کہیں تو پیپلزپارٹی کو برا لگتا ہے، پیپلزپارٹی کو کچھ کہیں تو ن لیگ کو برا لگتا ہے۔

مزید پڑھیں: اپوزیشن جماعتوں کی مہمند ڈیم کے کنٹریکٹ پرتنقید، فیصل واوڈا کا جواب

انہوں نے کہا کہ مہمند ڈیم کے ٹھیکے میں پیپر رولز کی خلاف ورزی نہیں کی گئی، ٹھیکے سے متعلق اخبار میں اشتہار آنے کے بعد قانون کی کوئی خلاف ورزی نہیں کی گئی، ڈیم بنے گا ٹھیکہ منسوخ نہیں ہوگا۔

فیصل واوڈا نے کہا کہ ملک میں 53 سال بعد کوئی ڈیم بننے جارہا ہے، ڈیم، اسکول اسپتال بن جائیں گے تو اپوزیشن کی سیاست ختم ہوجائے گی، اپنی کارکردگی سے اپوزیشن کو تکلیف دیں گے۔

ان کا کہنا تھا کہ داسو ڈیم بھی بننے جارہا ہے، وزیراعظم عمران افتتاح کریں گے، ڈیم بننے سے عوام پانی سے محروم نہیں رہیں گے، داسو ڈیم کے لیے ن لیگ کی حکومت نے کوئی پیسے نہیں دئیے تھے۔