ایف آئی اے نیشنل سینٹرل بیورو انٹرپول (این سی بی) پاکستان نے سنگین جرائم میں مطلوب 3 ملزمان کو گرفتار کر لیا۔ملزمان کو ابوظہبی سے گرفتار کرکے لاہور ائرپورٹ منتقل کر دیا گیا۔
اس حوالے سے ایف آئی اے ذرائع نے بتایا کہ تینوں گرفتار ملزمان پنجاب اور کے پی پولیس کو مطلوب تھے۔ ملزمان میں شعیب غنی، عبدالحمید اور خالد محمود شامل ہیں۔
ملزم عبدالحمید مردان پولیس جبکہ ملزم شعیب غنی اور خالد محمود فیصل آباد اور خانیوال پولیس کو مطلوب تھے، گرفتار ملزمان کے خلاف قتل اور اقدام قتل کی دفعات کے تحت مقدمات درج تھے۔
ایف آئی اے این سی بی انٹرپول پاکستان نے ملزمان کی گرفتاری کے لئے ریڈ نوٹسسز جاری کیے تھے۔ بعد ازاں ایف آئی اے امیگریشن نے ملزمان کو متعلقہ پولیس حکام کے حوالے کر دیا۔
ذرائع کے مطابق ملزمان کی حوالگی انٹرپول اسلام آباد کی انٹرپول ابوظہبی کے ساتھ قریبی رابطہ کاری کی وجہ سے ممکن ہوئی۔
ایف آئی اے این سی بی انٹرپول پاکستان بیرون ملک فرار ہونے والے ملزمان کی گرفتاری کے لئے گراں قدر خدمات سرانجام دے رہا ہے۔
ترجمان ایف آئی اے کا کہنا ہے کہ انتہائی مطلوب ملزمان کی گرفتاری اور بروقت حوالگی کے لئے این سی بی انٹرپول پاکستان ہمہ وقت کوشاں ہے۔