بیجنگ : فیلڈ مارشل سید عاصم منیر نے چین کی اعلیٰ سیاسی اور عسکری قیادت سے ملاقاتیں کیں ، چینی قیادت نے پاکستانی افواج کو جنوبی ایشیا کے امن کی علامت قرار دیا۔
تفصیلات کے مطابق آرمی چیف فیلڈ مارشل سید عاصم منیر نے عوامی جمہوریہ چین کے سرکاری دورے کے دوران بیجنگ میں چین کی اعلیٰ سیاسی اور عسکری قیادت کے ساتھ اعلیٰ سطحی ملاقاتیں کیں۔
پاک فوج کے شعبہ تعلقات عامہ (آئی ایس پی آر) کی جانب سے بیان میں کہا کہ آرمی چیف نے چین کے نائب صدر ہان ژینگ اور چین کے وزیر خارجہ سے ملاقات کی، جس میں علاقائی اور بین الاقوامی سیاسی پیشرفت، سی پیک کے تحت رابطے کے اقدامات اور مشترکہ جغرافیائی سیاسی چیلنجوں کے لئے مربوط ردعمل کی ضرورت پر توجہ مرکوز کی گئی۔
آئی ایس پی آر کا کہنا تھا کہ دونوں جانب سے مثالی دوطرفہ تعلقات پر اطمینان کا اظہار کیا گیا اور مساوات، کثیرالجہتی تعاون اور طویل المدتی علاقائی استحکام کے لئے مشترکہ عزم کا اعادہ کیا گیا۔ چینی قیادت نے پاکستان کی مسلح افواج کے عزم اور جنوبی ایشیا میں فروغ امن کے لئے اہم کردار کو سراہا۔
فیلڈ مارشل عاصم منیر نے سینٹرل ملٹری کمیشن کے وائس چیئرمین جنرل ژانگ یوشیا، پی ایل اے آرمی کے پولیٹیکل کمشنر جنرل چن ہوئی اور پی ایل اے آرمی کے چیف آف اسٹاف لیفٹیننٹ جنرل کائی ژائی جون سے ملاقاتیں کیں۔
ترجمان نے کہا کہ پی ایل اے آرمی ہیڈ کوارٹر پہنچنے پر آرمی چیف فیلڈ مارشل کو گارڈ آف آنر پیش کیا گیا، بعدازاں ملاقاتوں میں دفاعی اور سیکورٹی تعاون پر جامع بات چیت کی گئی، جس میں انسداد دہشت گردی تعاون، مشترکہ تربیت، دفاعی شعبے میں جدت اور اداروں میں روابط میں اضافہ شامل ہے ساتھ ہی ہائبرڈ اور بین الاقوامی خطرات کا مقابلہ کرنے کے لیے آپریشنل انٹرآپریبلٹی اور اسٹریٹجک کوآرڈینیشن کو بہتر بنانے پر زور دیا گیا۔
چینی عسکری قیادت نے مستحکم دوطرفہ دفاعی شراکت داری پر مکمل اعتماد کا اظہار کیا اور علاقائی امن کے فروغ میں پاکستان کے کلیدی کردار کا اعتراف کیا۔
فیلڈ مارشل عاصم منیر نے چین کی مسلسل حمایت کو سراہا اور تمام شعبوں میں ملٹری ٹو ملٹری تعاون کو مزید وسعت دینے کے پاکستان کے عزم کا اعادہ کیا۔
ترجمان کے مطابق یہ دورہ دونوں برادر ممالک کے درمیان وسعت پاتے سیاسی اور فوجی تعلقات کی گہرائی کی عکاسی کرتا ہے اور پائیدار اعلیٰ سطحی بات چیت اور روابط کے ذریعے علاقائی سلامتی کو آگے بڑھانے کے لئے ان کے مشترکہ عزم کو اجاگر کرتا ہے۔