راولپنڈی : سیکیورٹی ذرائع کا کہنا ہے کہ بلوچ لبریشن آرمی (بی ایل اے) اور مجید بریگیڈ کو دہشتگرد تنظیمیں قرار دینا فیلڈ مارشل کی سفارتی کامیابی کا اہم مظہر ہے۔
اسلام آباد: فیلڈ مارشل سید عاصم منیر کے حالیہ دورہ امریکا اور کامیاب ملٹری ڈپلومیسی کے نتیجے میں پاکستان کے مؤقف کو عالمی سطح پر بھرپور پذیرائی ملی ہے۔
سیکیورٹی ذرائع نے بتایا کہ فیلڈ مارشل کی کاوشوں سے بھارت کا دہشتگرد چہرہ بے نقاب ہو چکا ہے۔
ذرائع کا کہنا ہے کہ بلوچ لبریشن آرمی (بی ایل اے) اور مجید بریگیڈ کو دہشتگرد تنظیمیں قرار دینا فیلڈ مارشل کی سفارتی کامیابی کا اہم مظہر ہے، جب کہ فتنہ الہندوستان کو عالمی دہشت گرد تنظیم قرار دینے سے بھارت کے مکروہ عزائم دنیا کے سامنے آ گئے ہیں۔
سیکیورٹی ذرائع نے کہا کہ بھارتی خفیہ ایجنسی "را” کے فتنہ الہندوستان کے ساتھ براہِ راست روابط ثابت ہو چکے ہیں، بھارت نے اس تنظیم کو پاکستان میں دہشتگرد کارروائیوں کے لیے مالی امداد فراہم کی اور دہشتگردوں کو علاج کی سہولتیں بھی دیں اور گودی میڈیا نے ان کی کارروائیوں کو جواز فراہم کرنے کی بھی کوشش کی۔
ذرائع کی جانب سے مزید کہا گیا کہ بھارتی وزیر اعظم نریندر مودی اور مشیر قومی سلامتی اجیت دوول نے بلوچستان میں فتنہ الہندوستان کے ساتھ روابط کا برملا اعتراف کیا تھا، جب کہ کلبھوشن یادیو کی گرفتاری بھارتی ریاستی سرپرستی میں دہشتگردی کا واضح ثبوت ہے۔
ذرائع کے مطابق بھارت کے دہشتگردانہ عزائم نہ صرف خطے بلکہ عالمی امن کے لیے بھی سنگین خطرہ ہیں، اور حالیہ امریکی فیصلہ پاکستان کے مؤقف کی توثیق ہے