اسلام آباد : معاون خصوصی فردوس عاشق اعوان نے کہا کہ پاکستانی عوام قومی معاملات اور ملکی مفاد کے تحفظ کے لیے متحد ہیں، امید ہے آرمی ایکٹ پر مفاہمت کی فضا کی جھلک سینیٹ میں بھی نظر آئے گی۔
یہ بات انہوں نے سماجی رابطے کی ویب سائٹ ٹوئٹر پر اپنے پیغام میں کہی۔ انہوں نے کہا کہ آرمی ایکٹ پر سیاسی قوتوں کا اتحاد اعلیٰ پارلیمانی جمہوری روایات کا آئینہ دارہے، سیاسی ہم آہنگی اورقومی یکجہتی کامظاہرہ دشمن قوتوں کےلیے واضح پیغام ہے۔
اپنے پیغام میں انہوں نے کہا کہ پاکستانی عوام قومی معاملات اور ملکی مفادات کے تحفظ کے لیے متحد ہیں، خطے کی موجودہ صورتحال اور ملکی مفاد میں ہم آہنگی اور یکجہتی کی فضا کو مزید آگے بڑھانا ہے، امید ہے مفاہمت کی فضا کی جھلک سینیٹ میں بھی نظر آئے گی۔
اس سے قبل اپنے ایک بیان میں ان کا کہنا تھا کہ پاکستان کے ادارے قومی سلامتی کے ضامن ہیں، آرمی ایکٹ جیسے اہم قومی مسئلے پر سینیٹ سے رجوع کیا گیا ہے۔
اپوزیشن کی تمام جماعتیں محب وطن اور اتحاد کی ضامن ہیں۔ دفاع سے جڑے معاملات کو سیاست سے پاک ہونا چاہیے، اداروں کو سیاست زدہ بنانے کا رجحان ختم ہونا چاہیے۔