خوشاب: مسلم لیگ ن کی رہنما مریم نواز پر سرکاری فنڈز سے 34 من پھول نچھاور کیے جانے کا انکشاف ہوا ہے۔
اے آر وائی نیوز کے نمائندے کے مطابق مریم نواز نے 12 جولائی کو انتخابی مہم کے سلسلے میں رنگپور شہر کا دورہ کیا تھا، اس موقع پر ان پر 4 لاکھ مالیت سے زائد کے 34 من پھول نچھاور کیےگئے تھے۔
مریم نواز کے استقبال پر محکمہ انہار کے فنڈز کا مبینہ استعمال کیا گیا ہے، محکمہ انہار رنگ پور سرکل کے ایک اہل کار نے اس امر کا بھانڈا پھوڑ دیا۔
رنگپور آمد پر شہر کے ایک ہیڈ برج سے مریم نواز پر گل پاشی کی گئی تھی، جس کی فوٹیج بھی سامنے آ گئی ہے۔
محکمہ انہار کے اہل کار نے تفصیلات بتاتے ہوئے دعویٰ کیا ہے کہ گل پاشی کے لیے پھول ٹوبہ ٹیک سنگھ اور جھنگ سے منگوائے گئے تھے۔
اہل کار نے مزید بتایا کہ مریم نواز پر گل پاشی کے لیے 100 سے زائد ملازم بھی تعینات کیے گئے تھے، اور ان پھولوں کا بل محکمہ انہار تریموں ایکس ای این جھنگ نے ادا کیا ہے۔
واضح رہے کہ مریم نواز پر اتنی زیادہ گل پاشی کا یہ پہلا واقعہ نہیں ہے، وہ جب کسی شہر جاتی ہیں تو کارکنان والہانہ استقبال کرتے ہیں، اور مقامی رہنما ان پر پھولوں کی بارش کر دیتے ہیں۔