لاہور: صوبائی وزیر صنعت و تجارت میاں اسلم اقبال نے کہا ہے کہ سابق حکمران پنجاب کو چودہ سو ارب روپے کا مقروض چھوڑ کر گئے ہیں۔
ان خیالات کا اظہار انہوں نے لاہور میں انجمن تاجران کے عہدیداروں کی تقریب حلف برداری سے خطاب کرتے ہوئے کیا، پنجاب کے وزیر صنعت و تجارت میاں اسلم اقبال کا کہنا تھا کہ مسائل سے گھبرانے والے نہیں ہیں۔
انہوں نے کہا کہ عوام کے مسائل کم کریں گے، حکومت پڑھے لکھے ہنر مند طلبہ و طالبات کو تیس لاکھ روپے تک قرضہ دے گی، اس قرضے پر شرح سود انتہائی کم ہوگی۔
میاں اسلم اقبال کا کہنا تھا کہ کسی بھی محکمے کا افسر اب فیکٹریوں پر چھاپے نہیں مار سکے گا، کاروباری طبقہ میں پھیلائی جانے والی خوف و ہراس کی فضا کم کریں گے۔
ان کا کہنا تھا کہ تاجر بھی دیانتداری سے ٹیکس ادا کریں، کوئی بھی بزنس مین کسی بھی وقت اپنے مسائل کے حل کے لیے مجھ سے مل سکتا ہے۔
ان کا مزید کہنا تھا کہ کاروباری طبقہ کا ملکی معیشت میں اہم کردار ہے، تاجروں کو ہر ممکن سہولت دیں گے، ملکی ترقی ہماری اولین ترجیح ہے۔