کراچی: ایس ایس جی سی کو گیس فراہم کرنے والی گمبٹ جی پی ایف فورفیڈر لائن میں لیکیج ہوئی تھی، جس کا مرمتی کام مکمل کرلیا گیا۔
ترجمان سوئی سدرن گیس کمپنی نے بتایا کہ گزشتہ رات گمبٹ جی پی ایف فورفیڈر لائن میں لیکیج کے باعث سسٹم میں 38 ایم ایم سی ایف ڈی گیس کی کمی ہوئی، گمبٹ فیلڈ کی جی پی ایف فورفیڈر لائن کا مرمتی کام مکمل ہوگیا ہے۔
ایس ایس جی سی ترجمان نے بتایا کہ ایس ایس جی سی سسٹم میں گیس معمول کے مطابق آنا شروع ہوگئی ہے، سندھ اور بلوچستان کے کچھ علاقوں میں گیس کا کم پریشرمعمول کے مطابق بحال ہوگیا۔
خیال رہے کہ سوئی سدرن انتظامیہ نے شہر قائد میں گیس کی عارضی بندش کا اعلان کیا تھا، ترجمان کا کہنا تھا کہ مرمتی کام کے باعث کراچی میں 20 گھنٹے کے لیے گیس کی فراہمی بند رہے گی۔
سوئی سدرن گیس کمپنی کو گیس فراہم کرنے والی گمبٹ جی پی ایف فور فیڈر لائن میں لیکیج کے باعث کراچی میں گیس کی فراہمی معطل ہوئی تھی۔
ترجمان کا کہنا تھا کہ پائپ لائن کی مرمت کا کام اگلے 20 گھنٹے میں مکمل ہونے کا امکان ہے، جس کی وجہ سے سندھ اور بلوچستان کے کچھ علاقوں کو گیس کے کم پریشر کا سامنا کرنا پڑے گا۔