ARYNews.tv | Urdu – Har Lamha Bakhabar

جرمنی کے سفیر کا پشاور میں مٹر گشت، خریداری کی، حجامت بنوائی

Written by

ویب ڈیسک

in

پشاور: پاکستان میں تعینات جرمنی کے سفیر مارٹن کوبلر نے پشاور کا دورہ کیا اور ایک چھوٹی سی دکان سے حجامت بنوائی۔

تفصیلات کے مطابق آپریشن ضرب عضب اور ردالفساد کے بعد ملک میں امن قائم ہوگیا جس کو اب دنیا کے تمام ممالک تسلیم کررہے ہیں، انٹرنیشنل فٹ بالرز، ریسلرز اور کرکٹرز کے دوروں سے پاکستان کا مثبت چہرہ دنیا کے سامنے آیا۔

پاکستان میں تعینات جرمنی کے سفیر مارٹن نے سماجی رابطے کی ویب سائٹ پر اپنی تصاویر شیئر کیں جس کے ساتھ انہوں نے لکھا کہ ’پشاور کے بازار کی سیر اور پرانی گلیوں میں بیٹھے نائی سے حجامت بنوائی‘۔

جرمنی کے سفیر نے سماجی رابطے کی ویب سائٹ پر تصاویر کے ساتھ پیغام اردو میں شیئر کی، تصاویر میں دیکھا جاسکتا ہے کہ مارٹن بازار میں خریداری کررہے ہیں اور ایک نائی سے اپنے بال کٹوا رہے ہیں۔

مارٹن کی شیئر کی گئی تصاویر کو تحریک انصاف کے آفیشل اکاؤنٹ سے ری ٹوئٹ کیا گیا اور اُس کے ساتھ تحریر کیا گیا کہ ’مارٹن کا دورہ اس بات کی غمازی ہے کہ خیبرپختونخوا میں امن قائم ہوگیا‘۔

دوسری جانب مارٹن نے ایک اور ٹوئٹ میں ورلڈ الیون کے دورہ پاکستان پر خوشی کا اظہار کیا اور کہا کہ ’بین الاقوامی کرکٹ کی واپسی خوش آئند ہے، پاکستان کی جیت پر مبارک باد پیش کرتا ہوں‘۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

More posts