پشاور: خیبر پختونخوا کے گلیشیئرز والے علاقوں میں گلیشیائی جھیلیں پھٹنے کے واقعات کا خطرہ بڑھ گیا ہے۔
پی ڈی ایم اے کے مطابق چترال، دیر، سوات، کوہستان کی ضلعی انتظامیہ کو گلیشیائی جھیلوں کے پھٹنے کے بڑھتے خطرے کا الرٹ جاری کیا گیا ہے، اور ہدایت کی گئی ہے کہ عوام گلیشیئرز کے ممکنہ پھٹنے سے متعلق خبردار رہیں۔
ضلعی انتظامیہ کو حساس مقامات کی نگرانی اور آبادی کے انخلا کی مشقیں یقینی بنانے کی ہدایت کی گئی ہے، پی ڈی ایم اے کا کہنا ہے کہ ندی نالوں کے قریب غیر ضروری نقل و حرکت نہ کی جائے اور گاڑیاں بہتے پانی میں نہ لے جائیں۔
ممکنہ متاثرہ علاقوں میں انخلا کے مقامات تیار کرنے اور ریسکیو سروسز الرٹ رکھی جائیں، سیاحوں کو محتاط رہنے اور احتیاطی تدابیر اختیار کرنے کی ہدایت کی گئی ہے، پی ڈی ایم اے نے سڑکوں کی بروقت بحالی کے لیے این ایچ اے، ایف ڈبلیو او، سی اینڈ ڈبلیو کو بھی الرٹ کر دیا ہے۔
ملک بھر میں مون سون بارشوں کا تباہ کن اسپیل، چوبیس گھنٹوں میں مزید 17 افراد جاں بحق
الرٹ میں کہا گیا ہے کہ ضلعی انتظامیہ ممکنہ خطرے کی صورت میں ہنگامی اقدامات یقینی بنائے، عوامی آگاہی مہم شروع کی جائے، اور نقصانات سے بچاؤ کے اقدامات سے آگاہ کیا جائے، نیز پی ڈی ایم اے کا ایمرجنسی آپریشن سینٹر مکمل فعال ہے اور عوام 1700 پر رابطہ کر سکتے ہیں۔
واضح رہے کہ گلگت بلتستان میں بارشوں سے لینڈ سلائیڈنگ ہوئی ہے، جس سے قراقرم ہائی وے تتہ پانی کے مقام پر بند ہو گئی ہے، ترجمان صوبائی حکومت فیض اللہ فراق کے مطابق کچھ مسافر گاڑیاں پھنس گئی ہیں، سڑک کی بحالی کا کام شروع کیا جا چکا ہے، اور بند شاہراہ جزوی طور پر بحال کر دی گئی ہے۔
پولیس نے خبردار کیا ہے کہ دیامر میں بارشوں کا سلسلہ وقفے وقفے سے جاری ہے، مسافر حضرات سفر سے قبل راستے کی صورت حال معلوم کریں، کیوں کہ دیامر اور کوہستان کے پہاڑی علاقوں میں لینڈ سلائیڈنگ کا خدشہ ہے، حالیہ بارشوں اور سیلاب سے دیامر کے بالائی علاقوں کو شدید نقصان پہنچا ہے، رابطہ سڑکیں متاثر اور عوام کو مشکلات کا سامنا ہے۔