کراچی : سونے کی قیمت میں گزشتہ دنوں مسلسل اضافے کے بعد اچھی خبر آگئی، فی تولہ قیمت میں سیکڑوں روپے کمی ریکارڈ کی گئی ہے جبکہ عالمی مارکیٹ میں بھی قیمت میں نمایاں کمی سامنے آئی ہے۔
تفصیلات کے مطابق آل پاکستان جیمز اینڈ جیولرز ایسوسی ایشن کا کہنا ہے کہ ملک بھر کی صرافہ مارکیٹوں میں آج سونے کی فی تولہ قیمت میں 1900 روپے کی نمایاں کمی واقع ہوئی ہے۔
عہدیداران کے مطابق 1900 روپے کی کمی کے بعد فی تولہ سونا 2 لاکھ 20 ہزار 900 روپے کا ہوگیا ہے جبکہ 10 گرام سونے کا بھاؤ 1629 روپے کم ہوکر ایک لاکھ 89 ہزار 386 روپے ہے۔
دوسری جانب جیولرز ایسوسی ایشن کے مطابق عالمی بازار میں سونے کا بھاؤ 15 ڈالر کم ہوکر 2070 ڈالر فی اونس ہے۔
واضح رہے کہ مئی 2023 میں فی تولہ اور 10 گرام سونے کی قیمت تاریخ کی بُلند ترین سطح 2 لاکھ 40 ہزار روپے اور 2 لاکھ 5 ہزار 761 روپے پر پہنچ گئی تھی۔