35 ویں نیشنل گیمز کراچی میں منعقد ہوں گے جس میں شریک کھلاڑیوں سے متعلق اہم سندھ حکومت نے فیصلہ کیا ہے۔
اے آر وائی نیوز کے مطابق پاکستان اولمپکس ایسوسی ایشن نے کراچی میں 35 ویں نیشنل گیمز کے انعقاد کی منظوری دے دی ہے جس کے بعد ایونٹ کے حوالے سے سندھ حکومت نے اہم فیصلہ کیا ہے۔
پاکستان اولمپک ایسوسی ایشن کا اجلاس صدر سید عابد قادری کی زیر صدارتی ہوا جس میں 35 ویں نیشنل گیمز کراچی میں کرانے کی منظوری دی گئی۔ اجلاس میں سندھ کے وزیر کھیل وامور نوجوانان سردار محمد بخش مہر کے علاوہ پی او اے کے سیکرٹری جنرل محمد خالد محمود، سندھ اولمپک ایسوسی ایشن کے سیکریٹری احمد علی راجپوت ودیگر بھی شریک تھے۔
سیکرٹری سندھ اولمپک احمد علی راجپوت نے گیمز کے انتظامات کے حوالے سے شرکا کو بریفنگ دی۔ اجلاس میں فیصلہ کیا گیا کہ سندھ گیمز کی ٹارچ ریلے کے افتتاح کیلیے چیئرمین بلاول بھٹو زرداری کو مدعو کیا جائے گا جبکہ نیشنل گیمز میں شریک کھلاڑیوں کا ڈوپ ٹیسٹ کرایا جائے گا۔
اجلاس سے خطاب کرتے ہوئے صوبائی وزیر کھیل سردار محمد بخش مہر نے کہا کہ پاکستان اولمپک اور سندھ اولمپک کی باہمی مشاورت سے نیشنل گیمز کی تاریخوں کااعلان کیا جائے گا۔ نیشنل گیمز کو کامیاب بنانے کیلیے تمام ممکنہ اقدامات کیے جائیں گے اور سیکیورٹی میں اداروں کے ساتھ اسکاؤٹس کی خدمات لی جائیں گی۔