لاہور (19 جولائی 2025): امیر جماعت اسلامی پاکستان حافظ نعیم الرحمان نے چینی مافیا، پیٹرولیم مصنوعات اور بجلی کی قیمتوں میں اضافے کے خلاف ملک بھر میں دھرنوں کا اعلان کر دیا۔
پارٹی قیادت کے ہمراہ پریس کانفرنس کرتے ہوئے حافظ نعیم الرحمان نے کہا کہ سینیٹ کی سیٹوں اور تنخواہوں میں اضافے کیلیے تمام سیاستدان اکٹھے ہو جاتے ہیں لیکن جب عوام کے مسائل کی بات آتی ہے تو یہ سب الگ ہو جاتے ہیں۔
امیر جماعت اسلامی نے کہا کہ پیٹرول کی قیمت میں 20 روپے فی لیٹر اضافہ کر دیا گیا ہے جو ہرگز قبول نہیں، کل ملک بھر میں احتجاج اور دھرنے ہوں گے جہاں آئندہ کا لائحہ عمل طے کریں گے۔
یہ بھی پڑھیں: حافظ نعیم نے سیاسی رہنماؤں کو مفت بجلی دینے کے وعدے یاد کروا دیے
حافظ نعیم الرحمان نے کہا کہ حکومت اور اپوزیشن اپنی مراعات میں لگے ہیں، یہ فلسطین پر کبھی ایک نہیں ہوتے لیکن اپنے مفادات پر ان میں اتفاق پیدا ہو جاتا ہے، عوام کے مفاد کیلیے ان میں اتحاد نہیں، ہر 15 دن میں یہ پیٹرول کی قیمتیں بڑھا دیتے ہیں، جماعت اسلامی عوام کو تنہا نہیں چھوڑ سکتی۔
انہوں نے مزید کہا کہ چینی برآمد کیوں کی گئی اور اب درآمد کیوں ہو رہی ہے؟ ہر حکومت میں چینی مافیا سرگرم ہوتا ہے، چینی، پیٹرول اور گیس کی قیمتیں مسلسل بڑھائی جا رہی ہیں، وزارتِ پیٹرولیم کے کہنے پر گیس کی پیداوار روکی گئی۔
ان کا کہنا تھا کہ آئی پی پیز کو ادائیگیاں عوام سے وصول کی جا رہی ہیں، سولرائزیشن کا حکمرانوں کو علم ہی نہیں، ناقص حکمت عملی کا بوجھ غریب پر ڈالا جا رہا ہے، پاکستان میں عوام، کسان اور مزدور کیلیے کوئی بات نہیں کر رہا، چینی، بجلی اور پیٹرول مہنگائی کے خلاف میدان میں آئیں گے۔
حافظ نعیم الرحمان نے اعلان کیا کہ کل تمام بڑے شہروں میں جماعت اسلامی کا احتجاجی دھرنا ہوگا۔
انہوں نے مطالبہ کیا کہ بجلی کے بلوں میں سلیب سسٹم نامنظور ہے صرف استعمال کے مطابق بل لیا جائے، بجلی کے بلوں میں تمام ٹیکس ختم کیے جائیں، ایف بی آر اہلکار 1300 ارب روپے ٹیکس چوری کرتے ہیں، تاجروں کے جائز مطالبات کی مکمل حمایت کرتے ہیں، مافیاز کے فیصلوں کے خلاف قوم کو اٹھنا ہوگا۔