غزہ میں بچے بھوک سے مررہے ہیں اور دنیا دیکھ رہی ہے، ہیلی بیبر

امریکی ماڈل ہیلی بیبر نے بھی غزہ میں اسرائیلی ظلم و ستم پر آواز بلند کردی۔

انسٹاگرام پوسٹ میں امریکی ماڈل ہیلی بیبر نے غزہ میں بگڑتے ہوئے انسانی بحران کی طرف توجہ دلانے کہا ہے جہاں ہزاروں بچے اور خاندان شدید بھوک کا شکار ہیں۔

انہوں نے لکھا کہ ’غزہ میں بچوں اور خاندانوں کے لیے بھوک ایک خوفناک حقیقت ہے، بڑے پیمانے پر امداد کی فوری اجازت دی جانی چاہیے۔‘

ہیلی بیبر نے کہا کہ غزہ کی پٹی میں بچے بھوک سے مررہے ہیں، شدید غذائی قلت ان تک امداد پہنچنے سے زیادہ تیزی سے پھیل رہی ہے جبکہ دنیا اسے ہوتا دیکھ رہی ہے۔

غزہ کی وزارت صحت کے مطابق اکتوبر 2023 میں اسرائیل کی جانب سے فوجی مہم شروع کرنے کے بعد سے اب تک کم از کم 115 فلسطینی بھوک سے مرچکے ہیں، زیادہ تر متاثرین بچے ہیں جن میں زیادہ تر اموات حالیہ ہفتوں میں ہوئیں کیونکہ حالات بدتر ہوتے جارہے ہیں۔

گزشتہ روز اسرائیلی حملے میں کم از کم 62 فلسطینی شہید ہوئے ان میں 19 افراد وہ بھی شامل تھے جو ضروری امداد جمع کرنے کی کوشش کرہے تھے۔

اطلاعات کے مطابق بھوک کا بحران اب اس سے زیادہ تیزی سے جانیں لے رہا ہے کہ انسانی امداد ضرورت مندوں تک پہنچ سکتی ہے۔

علاوہ ازیں اسرائیل کے اندر ہی اختلاف بڑھ رہا ہے، تل ابیب میں درجنوں اسرائیلی نوجوانوں نے غزہ پر جنگ کے خلاف احتجاج کے طور پر فوج میں خدمات انجام دینے سے انکار کرتے ہوئے اپنے ڈرافٹ آرڈرز کو سرعام جلا دیا۔