برطانیہ میں شدید سردی، ہر چیز برف سے ڈھک گئی، اسکول اور ٹریفک سب بند

برطانیہ میں شدید برفباری نے موسم انتہائی سرد کر دیا ہے محکمہ موسمیات نے یلو وارننگ جاری کر دی ہے جب کہ 200 سے زائد اسکولز بند کر دیے گئے ہیں۔

غیر ملکی میڈیا کے مطابق برطانیہ میں شدید برفباری کا سلسلہ شروع ہونے کے بعد ملک میں موسم انتہائی سرد ہو گیا ہے۔ ملک کے طول وعرض میں سڑک، گاڑیاں، عمارتیں، درخت ہر چیز نے برف کی سفید چادر اوڑھ لی ہے۔

موسم کی پہلی برفباری نے برمنگھم کو بھی اپنی لپیٹ میں لے لیا ہے۔ مانچسٹر، لیڈز اور بریڈ فورڈ سمیت کئی علاقوں میں سفیدی چھا گئی ہے۔ کئی علاقوں میں درجہ حرارت نقطہ انجماد سے نیچے گر چکا ہے۔

بالخصوص شمالی انگلینڈ، شمالی آئرلینڈ اور شمالی اسکاٹ لینڈ کے کچھ علاقوں میں برفباری کے بعد لوگوں کو گھروں میں رہنے کا مشورہ دیا گیا ہے جب کہ محکمہ موسمیات نے ان علاقوں میں یلو وارننگ جاری کرتے ہوئے 20 سینٹی میٹر تک برفباری کی پیشگوئی کی ہے۔

سڑکیں برف سے ڈھک جانے کے باعث گاڑیوں کی آمدورفت مشکل ہوچکی ہے۔ کئی ریلوے سروسز کو منسوخ کر دیا گیا ہے۔

خراب موسمی صورتحال کے باعث ملک بھر میں 200 سے زائد اسکول بند کر دیے گئے ہیں۔ ویلز میں 141، ویسٹ مڈلینڈز میں 50، اسکاٹ لینڈ میں 11 اور ڈربی شائر میں 19 اسکول بند کیے گئے ہیں۔ جنوبی ویلز میں بھی برف باری اور برفیلی سطح کی وارننگ جاری کر دی گئی ہے۔