شوبز انڈسٹری کی ابھرتی ہوئی اداکارہ حنا چوہدری کا کہنا ہے کہ شوہر علی فاروق سے ان کی پہلی ملاقات یونیورسٹی میں ہوئی تھی۔
اے آر وائی ڈیجیٹل کے ڈرامہ سیریل ’رسم وفا‘ میں ’نور‘ کا کردار نبھانے والی اداکارہ حنا چوہدری نے شوہر علی فاروق کے ساتھ پروگرام ’گڈ مارننگ پاکستان‘ میں شرکت کی اور اس دوران مختلف موضوعات پر اظہار خیال کیا۔
حنا چوہدری نے بتایا کہ شوہر سے پہلی ملاقات یونیورسٹی میں ہوئی، پھر علی نے کہا کہ میرا یونیورسٹی میں بی بی اے ختم ہوچکا تھا، میں شام میں وہاں ایم فل کی کلاسز لے رہا تھا اور دن میں نوکری کرتا تھا۔
انہوں نے کہا کہ میرے بی بی اے میں مارکس اچھے تھے تو یونیورسٹی نے جونیئر لیکچرار کی جاب آفر کی تھی۔
حنا چوہدری نے بتایا کہ ہماری یونیورسٹی میں بھی ون آن ون کبھی بات نہیں ہوئی کیونکہ یہ فیکلٹی میں تھے زیادہ کام کے حوالے سے بات ہوتی تھی، اس کے بعد علی یونیورسٹی چھوڑ گئے اور کوئی کمپنی جوائن کرلی تھی، میرا یونیورسٹی میں کوئی جان پہچان والا نہیں تھا تو میں اپنے مسائل ان سے شیئر کرتی تھی۔
اداکارہ نے کہا کہ مجھے اکنامکس شروع سے برا سبجیکٹ لگتا تھا اور علی اس میں گولڈ میڈلسٹ تھے تو مجھے یہ تھا کہ کوئی بندہ مجھے پڑھا دے تو پاس ہوجاؤں، امی نے مشورہ دیا تھا کہ علی سے کہو کہ وہ تمہیں پڑھا دے پھر انہوں نے مجھے پڑھایا تھا۔
انہوں نے کہا کہ میری امی اور بہن کو علی بہت اچھے لگتے ہیں، یہ بہت ذمہ دار ہیں ابو لاہور میں نہیں تھے اور بھائی بھی نہیں تھا تو ہمیں جس بھی ضرورت ہوتی تھی تو یہ کام آتے تھے۔