اسلام آباد ہائیکورٹ میں ہائی پروفائل کیسز سمیت کتنے مقدمات عدالتی اوقات کار کے بعد سنے گئے یہ اعداد وشمار سامنے آگئے ہیں۔
اے آر وائی نیوز کو عدالت ذرائع سے اسلام آباد ہائیکورٹ کے ملنے والے ڈیٹا کے مطابق 2018 سے اب تک مجموعی طور پر 759 کیسز دفتری اوقات کے علاوہ سنے گئے ہیں۔
ذرائع نے بتایا کہ سال 2018 میں 137 مقدمات، 2019 میں 139، 2020 میں 138 کیسز عدالت کے دفتری اوقات کے علاوہ سنے گئے، اس کے علاوہ 2021 میں 180 اور رواں سال 2022 میں اب 165 کے کیسز کی سماعت دفتری اوقات کے علاوہ ہوچکی ہے۔
ذرائع کے مطابق ہائی پروفائل سمیت جھگیوں والوں کے کیسز سمیت عام سائلین کے مقدمات کی سماعت کی بھی دفتری اوقات کے علاوہ ہوتی رہی ہے۔
جن ہائی پروفائل کیسز کی سماعت دفتری اوقات کے علاوہ سنی گئی ان میں سابق وزرائے اعظم نواز شریف، عمران خان اور پی ٹی آئی رہنماؤں سمیت دیگر سیاسی کیسز شامل ہیں۔
نواز شریف کیس کی ہفتے کے روز سماعت پر تنقید کی گئی تھی اور عمران خان نے تاخیر سے عدالت اوپن ہونے پر بھی جلسوں میں اعتراض اٹھایا تھا جب کہ پی ٹی آئی رہ نماؤں کے لیے عید کی چھٹی کے روز عدالت اوپن ہوئی۔
پی ٹی آئی چیئرمین عمران خان کو اتوار کے روز حفاظتی ضمانت دی گئی تھی۔
واضح رہے کہ اسلام آباد ہائیکورٹ نے ہی 2019 پھر 2022 میں دفتری اوقات کے علاوہ کیسز سننے کا نوٹیفکیشن جاری کیا تھا۔