موجودہ دور میں ہر نوجوان اسمارٹ موبائل فون کا رسیا ہے لیکن دن میں کتنی وقت تک اس کا استعمال ان کے لیے مفید ہے اس حوالے سے نئی تحقیق میں انکشاف ہوا ہے۔
موبائل فون آج کے انسان کی ضرورت بن چکا ہے لیکن نوجوان نسل اس ضرورت کی چیز کو نشہ بنا لیا ہے اور اکثریت دن کا زیادہ وقت موبائل فون پر ہی گزارتی ہے۔ موبائل فون پر ایک دن میں کتنا وقت گزارنا ان کی صحت کے لیے بہتر ہے اس حوالے سے ایک تحقیق ہوئی ہے۔
غیر ملکی میڈیا کے مطابق اس حوالے سے جنوبی کوریا کی ہین یانگ یونیورسٹی میں کی ایک تحقیق ہوئی ہے جس میں معلوم ہوا ہے کہ روزانہ اسمارٹ فون کا دو گھنٹوں سے کم استعمال ذہنی صحت پر بالکل بھی استعمال نہ کیے جانے کے مقابلے میں زیادہ مفید اثرات رکھتا ہے جب کہ چار گھنٹوں سے زیادہ کا استعمال نوجوانوں کے ذہنی صحت کے مسائل میں مبتلا ہونے کے خطرہ بڑھا دیتا ہے۔
اس تحقیق کے لیے 2017 سے 2020 کے درمیانی عرصے میں 50 ہزار کورین افراد کو شامل کیا گیا اور ان سے دو طویل سوالنامے پُر کروائے گئے۔
ان میں سے ایک سوالنامے میں ان افراد سے ان کی جسمانی اور ذہنی صحت کے متعلق پوچھا گیا جبکہ دوسرے میں ان لوگوں نے اپنے اسمارٹ فون استعمال کے دورانیے کے متعلق بتایا۔
اس تحقیقی مطالعے میں محققین نے سوالناموں سے حاصل ہونے والے ڈیٹا کو استعمال کرتے ہوئے اسمارٹ فون کے استعمال اور صحت پر مرتب ہونے والے اثرات کے درمیان تعلق کا (عمر، جنس اور سماجی و معاشی رتبے کا خیال رکھتے ہوئے) جائزہ لیا۔
تحقیق میں معلوم ہوا کہ وہ افراد جو روزانہ ایک سے دو گھنٹے کے درمیان فون استعمال کرتے تھے ان میں ڈپریشن، خود کشی کے خیالات، نیند کے مسائل، ذہنی دباؤ اور شراب نوشی کی لت کے خطرات فون بالکل استعمال نہ کرنے والے افراد کی نسبت کم تھے۔
تاہم وہ افراد جو چار گھنٹے سے زیادہ وقت اپنے فون پر صرف کرتے تھے ان میں اِن ذہنی صحت کے مسائل اور نشہ آور اشیا کے استعمال کی شرح ان سے کم وقت میں موبائل فون استعمال کرنے والوں کے مقابلے میں زیادہ پائی گئی۔
تحقیق میں دیکھا گیا کہ وہ نوجوان جو دو گھنٹے سے کم وقت سوشل میڈیا پر صرف کرتے تھے ان میں ذہنی دباؤ کے خطرات 30 فی صد، نیند کے مسائل 27 فی صد، ڈپریشن کے امکانات 38 فی صد، خود کشی کے خیالات 43 فی صد اور شراب نوشی لت کے امکانات 47 فی صد تک کم تھے۔