حج کا رکن اعظم وقوف عرفات آج ادا کیا جا رہا ہے خطبہ حج اردو سمیت 20 زبانوں میں براہ راست نشر ہوگا جو منارہ الحرمین ڈیجیٹل پلیٹ فارم، قرآن وسنت چینلز اور 10 ایف ایم ریڈیو نشر کریں گے۔
غیر ملکی میڈیا کے مطابق مسجد الحرام اور مسجد نبوی کے امور کے لیے جنرل پریذیڈنسی میں زبان و ترجمے کا ادارہ اس سال حج سیزن میں اردو سمیت 20 بین الاقوامی زبانوں میں خطبہ حج کا ترجمہ نشر کرے گا۔ جن زبانوں میں خطبہ حج کا ترجمہ نشر کیا جائے گا ان میں اردو کے علاوہ فرانسیسی، انگریزی، فارسی، ہاؤسا، روسی، ترکی، پنجابی، چینی، مالائی، سواحلی، ہسپانوی، پرتگالی، امہاری، جرمن، سویڈش، اطالوی، ملیالم، بوسنیائی اور فلپائنی زبانیں شامل ہیں۔
رپورٹ کے مطابق منارہ الحرمین ڈیجیٹل پلیٹ فارم، قرآن وسنت چینلز اور 10 ایف ایم ریڈیو خطبہ حج کا ترجمہ نشر کریں گے۔
ادارے کے نائب جنرل صدر احمد الحیمدی نے بتایا کہ خطبہ حج کا ترجمہ ادارے کے 2024 کے سرٹیٹجک پلان کے مطابق ہے اور خطبہ حج کا ترجمہ نشر کرنے کےلیے’منارات الحرمین‘ پلیٹ فارم سے ڈیجیٹل سروسز سسٹم کی تیاریاں مکمل ہیں۔
جنرل پریذیڈنسی انڈر سیکرٹری جنرل برائے تکنیکی امور ڈیجیٹل تبدیلی اور مصنوعی ذہانت انجینیر وسام بن محمد مقادمی نے کہا کہ میدان عرفات کے خطبہ کے ترجمے کے منصوبے کا مقصد مسلمانوں کو ڈیجیٹل دنیا کو استعمال کرتے ہوئے خطبہ حج سننے اور دیکھنے کے قابل بنانا ہے۔ یہ سروس مسجد حرام کے منارات حرمین پلیٹ فارم کی ویب سائٹ اور سمارٹ فون ایپلی کیشنز کے ذریعے دنیا بھر میں 500 ملین سے زیادہ افراد تک پہنچانے کے لیے تیار کی گئی ہے۔
واضح رہے کہ 2017 میں پہلی مرتبہ پانچ بین الاقوامی زبانوں میں خطبہ حج کا ترجمہ نشر کیا گیا، بعد ازاں زبانوں کی تعداد بڑھا کر 10 کر دی گئی تھی اور گزشتہ سال 14 زبانوں میں خطبہ حج نشر کیا گیا تھا۔