پاکستان کی تحقیقاتی ایجنسی ایف آئی اے کو انسانی اسمگلنگ کیخلاف بہترین کارکردگی پر عالمی ایوارڈ سے نوازا گیا، سابق ڈائریکٹر ظہیر احمد نے انٹونی بلنکن سے ایوارڈ وصول کیا۔
امریکا کے شہر واشنگٹن میں منعقدہ تقریب میں یو ایس سیکریٹری اسٹیٹ انٹونی بلنکن نے بہترین کارکردگی پر سابق ڈائریکٹر ایف آئی اے ظہیر احمد کو ایوارڈ سے نوازا ہے۔
ظہیر احمد فیڈرل انویسٹی گیشن ایجنسی میں ڈائریکٹر اینٹی ہیومن اسمگلنگ یونٹ تعینات رہے ہیں، امریکی وزیر خارجہ انٹونی بلنکن نے انسانی اسمگلنگ کی روک تھام کیلئے ایف آئی اے کی بہترین اقدامات کو سراہا۔
ترجمان ایف آئی اے کے مطابق فیڈرل انویسٹی گیشن ایجنسی نے انسانی اسمگلنگ سے متعلق قانونی ڈھانچے کو مضبوط بنانے میں اہم کردار ادا کیا، ٹریفکنگ ان پرسنز ہیرو ایوارڈ ڈائریکٹر اینٹی ہیومن ٹریفکنگ سرکل ظہیر احمد کی غیر معمولی کاوشوں کا اعتراف ہے۔
ترجمان کا کہنا ہے کہ ایف آئی اے نے انسانی ٹریفکنگ کی روک تھام کیلئے دیگر اداروں کے ساتھ مل کر مؤثر حکمت عملی اپنائی، ان کاوشوں کے نتیجے میں سالانہ ٹریفکنگ ان پرسن رپورٹ میں پاکستان کو ٹیئر 2 واچ لسٹ سے ٹیئر 2 میں اپ ڈگریڈ کردیا گیا۔
ایف آئی اے ترجمان نے مزید کہا کہ انسانی اسمگلنگ کے خلاف جنگ میں اجتماعی اقدامات کرنے کی ضرورت ہے، انسانی ٹریفکنگ کا خاتمہ ایف آئی اے کی اولین ترجیح ہے، ایف آئی اے انسانی ٹریفکنگ کی روک تھام کیلئے دیگر اداروں کی ٹریننگ میں اہم کردار ادا کرتا رہے گا۔