شوبز اندسٹری کے معروف اداکار ہمایوں سعید کا سینئر اداکار فردوس جمال کی تنقید پر ردعمل آگیا۔
سینئر اداکار فردوس جمال نے نجی ٹی وی کے پروگرام میں کہا تھا کہ میری نظر میں ہمایوں سعید ایک اچھے اداکار نہیں ہیں ان سے بہتر اور باصلاحیت اداکار موجود ہیں۔
ان کا کہنا تھا کہ اللہ نے ہمایوں سعید کو بہت وسائل دیے ہیں انہیں پلیٹ فارمز ملے ہیں اور انہوں نے چند اچھے ڈراموں میں کام کیا ہے جس کی وجہ سے لوگ انہیں پسند کرتے ہیں۔
فردوس جمال کا کہنا تھا کہ ہمایوں سعید اپنے وسائل کا استعمال کرتے ہوئے آگے بڑھ رہے ہیں وہ اپنے سے کسی اچھے اداکار کو آگے نہیں آنے دیتے۔
ان کے بیان کے بعد نامور اداکاروں نے ہمایوں سعید کا دفاع کیا تھا اور فردوس جمال پر تنقید کی تھی۔
تاہم اب یاسر حسین نے اپنے آفیشل انسٹاگرام اسٹوری میں جاری کیے گئے پیغام میں کہا کہ مجھے ہمایوں سعید بہت پسند ہیں، وہ ہماری فلم انڈسٹری کے بڑے اسٹار ہیں لیکن میری نظر میں فردوس جمال صاحب بھی کمال اداکار ہیں۔
انہوں نے ٹی وی میزبانوں سے مخاطب ہوتے ہوئے کہا کہ اس عمر میں فردوس جمال کو شوز میں بلا کر ان سے خاص قسم کے متنازعہ سوال پوچھنا مناسب بات نہیں ہے۔
اداکار نے برہمی کا اظہار کرتے ہوئے کہا کہ ایک ہی بار فردوس جمال سے اسٹام پیپر پر لکھوا لیں کہ وہ ہمایوں سعید اور ماہرہ خان کے بارے میں کیا رائے رکھتے ہیں اور پھر انہیں بخش دیں۔
یاسر حسین کا یہ پیغام جہاں سوشل میڈیا پر وائرل ہوا تو وہیں ہمایوں سعید نے بھی یاسر حسین کی اسٹوری اپنی انسٹاگرام اسٹوری میں ری شیئر کرتے ہوئے کہا کہ ہاں! یہ پیغام تمام میزبانوں کے لیے ہے۔
