حیدرآباد: میٹرک بورڈ نے سائنس گروپ کے امتحانات کے نتائج کا اعلان کردیا ، تینوں پوزیشنز طالبات کے نام رہیں۔

تفصیلات کے مطابق حیدرآباد میٹرک بورڈ کے تحت دسویں جماعت سائنس گروپ کے امتحانات کے نتائج کا اعلان کردیا گیا۔ رواں سال تینوں پوزیشنز طالبات نے اپنے نام کرلیں۔

تفصیلات کے مطابق، طالبہ ارم بی بی نے 999 نمبر حاصل کرکے پہلی پوزیشن حاصل کی۔ دوسری اور تیسری پوزیشن بھی طالبات نے حاصل کی، جس پر چیئرمین تعلیمی بورڈ شجاع مہیسر نے کامیاب طلبہ کو مبارکباد پیش کی۔

بورڈ حکام کا کہنا تھا اس سال 75 ہزار 683 طلبا و طالبات نے امتحانات میں حصہ لیا جن میں سے 8 ہزار 760 طلبہ نے اے ون گریڈ حاصل کیا، جبکہ 5 ہزار 620 طلبہ امتحان میں فیل ہوگئے۔

چیئرمین بورڈ کا کہنا تھا کہ طالبات کی نمایاں کارکردگی خوش آئند ہے، نتائج اس بات کی عکاسی کرتے ہیں کہ صوبے میں معیاری تعلیم کے فروغ کے لیے اقدامات کے مثبت اثرات سامنے آرہے ہیں۔

یاد رہے کہ کراچی ثانوی تعلیمی بورڈ نے 5 روز قبل دسویں جماعت سائنس گروپ کے سالانہ امتحانات کے نتائج کا اعلان کیا تھا، اس سال کامیابی کا تناسب 83.93 فیصد رہا۔

مزید پڑھیں : مختلف امتحانی بورڈز نویں جماعت کے نتائج کا اعلان کب کریں گے؟

تعلیمی بورڈ اعلامیے کے مطابق امتحانات میں 173,738 امیدوار رجسٹرڈ ہوئے جن میں سے 172,391 نے امتحانات میں حصہ لیا اور ان میں سے 144,681 امیدوار تمام پرچوں میں کامیاب قرار پائے جبکہ 27,244 امیدوار ناکام رہے۔