اسلام آباد: وزیراعظم عمران خان نے کہا ہے کہ پلوامہ حملے سے متعلق دیے گئے بیان پر قائم ہوں، اگر بھارت ثبوت فراہم کرے گا تو پاکستان فوری کارروائی کرے گا۔
تفصیلات کے مطابق وزیراعظم پاکستان نے نریند مودی کو بڑا دھچکا دیتے ہوئے اپنے مؤقف پر ڈٹنے کا اعلان کردیا۔ عمران خان کا کہنا تھا کہ اگر بھارت کے پاس پلوامہ حملے سے متعلق شواہد ہیں تو پیش کرے۔
وزیراعظم کا کہنا تھا کہ ’مودی سےملاقات میں خطے سےغربت کےخاتمےپر اتفاق کیا تھا، کسی دہشت گرد واقعے سے خطے کا امن تباہ کرنے کی سازش کامیاب نہیں ہونے دیں گے‘۔
مزید پڑھیں: بھارت ایک طرف سے حملہ کرے گا، ہم ہر طرف سے حملہ کریں گے: پرویز مشرف
عمران خان کا کہنا تھا کہ پلوامہ واقعےسے قبل ستمبر2018میں امن خراب کرنے کی کوشش کی گئی، مگر افسوس اب الیکشن تک بھارت میں امن ایک خواب ہی رہ گیا، نریندرمودی کو خطےمیں امن کو موقع دیناہوگا۔
ایک روز قبل بھارتی وزیراعظم نریند مودی نے راجستھان میں سیاسی اجتماع سے خطاب کرتے ہوئے عمران خان سے ٹیلی فونک گفتگو کا حوالہ دیا تھا جس میں اُن کا کہنا تھا کہ عمران خان وزیراعظم بنےتو میں نے انہیں ٹیلی فون کرکےمبارک باددی تھی۔
مودی کا کہنا تھا کہ عمران خان کو پیش کش کی تھی کہ اب ہم مل کر غربت کےخاتمےکی جنگ لڑتےہیں، جس پر انہوں نے جواب دیا تھا کہ آئیےغربت اورجہالت کےخاتمےکی جنگ لڑیں۔
یہ بھی پڑھیں: بھارت کو پیغام ہے الزام سے نکلو، دلائل سے بات کرو: شہریار آفریدی
بھارتی وزیر اعظم کا کہنا تھا کہ عمران خان نےکہا تھا کہ میں پٹھان کابیٹاہوں، جوکہتاہوں وہی کرتاہوں، اب آزمانےکاوقت ہےعمران خان اپنےلفظوں پرکس حدتک قائم ہیں۔
یاد رہے کہ وزیراعظم عمران خان نے چند روز قبل بھارتی جارحیت کے جواب میں سرکاری ٹیلی ویژن پر خطاب کرتے ہوئے کہا تھا کہ ’بھارت کو ماضی سے سبق سیکھ کر آگے بڑھنا چاہیے تاہم اگر پاکستان پر حملے کا سوچا گیا تو بھرپور دفاع کیا جائے گا’۔
عمران خان نے بھارت کو پلوامہ حملے کے شواہد فراہم کرنے اور خطے میں امن و امان کی خاطر مذاکرات کرنے کا مشورہ بھی دیا تھا۔