لاہور: آئی سی سی کے چیئرمین گریگ بارکلے اور چیف ایگزیکٹو جیف ایلارڈائس پاکستان کرکٹ بورڈ (پی سی بی) کے اعلیٰ حکام سے ملاقات کے لیے دو روزہ دورے پر منگل کی صبح لاہور پہنچیں گے۔
تفصیلات کے مطابق انٹرنیشنل کرکٹ کونسل کے اعلیٰ حکام دورے کے دوران پی سی بی مینجمنٹ کمیٹی کے چیئرمین نجم سیٹھی (آئی سی سی کے ڈائریکٹر بھی ہیں)، پی سی بی کے چیف آپریٹنگ آفیسر بیرسٹر سلمان نصیر اور بورڈ کے دیگر حکام سے ملاقاتیں کریں گے۔
پی سی بی کی میڈیا ریلیز میں کہا گیا ہے کہ یہ مسٹر بارکلے کا پاکستان کا پہلا دورہ ہوگا جبکہ ایلارڈائس باقاعدگی سے پاکستان کا دورہ کرتے رہے ہیں وہ پہلے بطور آئی سی سی جنرل منیجر اور پھر بطور آئی سی سی چیف ایگزیکٹو پاکستان آ چکے ہیں۔
اکتوبر 2004 کے بعد یہ پہلا موقع ہوگا جب آئی سی سی کے دونوں اعلیٰ عہدیدار ایک ساتھ پاکستان کرکٹ ہیڈ کوارٹر کا دورہ کریں گے۔