دنیا بھر میں کرکٹ کے امور کی دیکھ بھال کرنے والی عالمی تنظیم (آئی سی سی) نے جعلی کرکٹ میچز کے معاملے پر تحقیقات کا فیصلہ کیا ہے۔
کرکٹ ویب سائٹ ’کرک انفو‘کے مطابق فرانس کے کرکٹ بورڈ پر آئی سی سی سے فنڈز کے حصول کے لیے خواتین ے جعلی کرکٹ میچز منعقد کرانے کے الزامات ہیں جس پر انٹرنیشنل کرکٹ کونسل نے تحقیقات کا فیصلہ کر لیا ہے۔
رپورٹ کے مطابق فرانس کے کرکٹ بورڈ کے خلاف سب سے پہلے یہ الزامات سابق فرینچ خاتون کرکٹر ٹریسی روڈریگوز نے عائد کیے تھے۔
ٹریسی روڈریگوز نے مقامی میڈیا ادارے ’فرانس 24‘ کو بتایا تھا کہ انہیں ایسا محسوس ہوا تھا کہ فرانس میں خواتین کے اُتنے کرکٹ میچز نہیں کھیلے جا رہے جتنے میچز منعقد کروانے کا دعویٰ کرکٹ بورڈ کی جانب سے کیا جا رہا تھا اور اس لیے انہوں نے اس معاملے کی تحقیقات کا فیصلہ کیا تھا۔
ان کا کہنا تھا کہ ’میں دو، تین بار وہاں (گراؤنڈز) میں گئی اور دیکھا کہ لوگ وہاں پکنک پر آئے ہوئے اور لوگ سائیکل چلا رہے ہیں۔ لیکن اگلے دن میں وہاں ہونے والے (جعلی) میچز کا نتیجہ آن لائن دیکھ رہی ہوتی تھی۔‘
اس معاملے کی تحقیق ’فرانس 24‘ نے بھی کی اور میڈیا آؤٹ لیٹ کے مطابق ان کی ٹیم پیرس میں ویمن ڈویژن کا ایک میچ دیکھنے گئی لیکن وہاں کوئی میچ نہیں ہو رہا تھا لیکن تین دن بعد ’فرانس کے کرکٹ بورڈ نے اس میچ کا نتیجہ اپنی ویب سائٹ پر جاری کر دیا۔
فرانسیسی کرکٹ بورڈ پر الزام عائد کرنے والی ٹریسی روڈریگوز 2021 میں فرانسیسی کرکٹ بورڈ کی رُکن بھی منتخب ہوئی تھیں تاہم رواں برس کے آغاز میں انہوں نے اپنے عہدے سے استعفیٰ دے دیا تھا۔
ایک رپورٹ کے مطابق آئی سی سی فرانس کرکٹ بورڈ کو 60 سے 70 فیصد بجٹ مہیا کر تی ہے جو کہ 2022 میں تقریباً 3 لاکھ 20 ہزار ڈالرز تھا اور آئی سی سی کو قوانین کے مطابق اس بجٹ میں سے تقریباً آدھی رقم خواتین اور جونیئر کرکٹ کے فروغ کے لیے استعمال ہونا لازمی ہے۔
اس حوالے سے آئی سی سی کا کہنا ہے کہ وہ اس طرح کے الزامات کو انتہائی سنجیدگی سے دیکھتے ہیں اور ان کی جانب سے جلد تحقیقات کا آغاز بھی متوقع ہے۔