اسلام آباد: ذرائع وزارت خزانہ کا کہنا ہے کہ انٹرنیشنل مانیٹری فنڈ ایگزیکٹیو بورڈ کا اجلاس آئندہ ماہ 7 دسمبر کو ہونے کا امکان ہے۔
تفصیلات کے مطابق آئی ایم ایف ایگزیکٹیو بورڈ کے ایجنڈے میں پاکستان کا کیس شامل ہونے کا امکان ہے۔ آئی ایم ایف بورڈ اجلاس سے قبل فنانسنگ کی ضروریات کو لازمی قرار دیا گیا ہے۔ پاکستان کو ایگزیکٹیو بورڈ منظوری کے بعد 70 کروڑ ڈالر کی دوسری قسط ملے گی۔
ذرائع نے انکشاف کیا کہ رواں مالی سال کے دوران پاکستان کو 25 ارب ڈالر فنانسنگ کی ضرورت ہے۔ لیجی دوست ملکوں سے ایک ارب ڈالر، ایگزم بینک سے 1.2 ارب ڈالرز ملنے کا بھی امکان ہے۔
ذرائع نے کہا کہ چین نے 2 سال کیلئے مزید قرض رول اوور کرنے کی یقین دہانی کرائی ہے۔ گردشی قرضے میں اضافہ روکنے کیلئے آئندہ بھی بجلی اور گیس ٹیرف بڑھانا ہوگا۔
ڈیجیٹل مارکیٹس، پراپرٹی اور ریٹیل سیکٹر کو ٹیکس نیٹ میں لایا جائے گا۔ عام انتخابات سے قبل نگراں حکومت فروری میں نئے قرض پروگرام پر بات کرسکتی ہے۔
نگراں حکومت آنے والی حکومت کیلئے معاشی حکمت عملی پر مبنی بلیو پرنٹ تیارکرے گی۔ رواں مالی سال مزید 10 لاکھ افراد کو ٹیکس نیٹ میں لایا جائے گا۔
ذرائع وزارت خزانہ کا کہنا ہے کہ مہنگائی میں کمی کیلئے آئی ایم ایف کو سخت مانیٹری پالیسی کی یقین دہانی کرائی۔ آئی ایم ایف کو مارکیٹ کے مطابق ایکسچینج ریٹ برقرار رکھنے کی یقین بھی دہانی کرائی۔