سعودی وزارت حج و عمرہ نے واضح کیا ہے کہ رمضان المبارک کے آخری عشرے میں عمرہ بکنگ کا عمل جاری رکھا جائے گا۔
وزارت کے مطابق آخری عشرے میں عمرہ کے خواہشمندوں کے لیے نسک اور توکلنا ایپ پر عمرہ بکنگ کی سہولت موجود ہو گی۔
عمرہ زائرین کو پابند کیا گیا ہے کہ وہ نسک اور توکلنا ایپ پر عمرہ پرمٹ حاصل کریں تاکہ سہولت سے مقررہ وقت میں عمرہ ادا کیا جاسکے۔
سعودی اخباری رپورٹ کے مطابق وزارت حج و عمرہ نے رمضان المبارک کے بابرکت مہینے میں زائرین کو ایک سے زائدہ عمرہ نہ کرنے کی تلقین کی ہے۔
اپنے بیان میں وزارت کا کہنا ہے کہ تمام لوگ رمضان میں ایک بار عمرہ کریں اور دوسروں کو سہولت سے عمرہ ادائیگی کا موقع دیں۔
وزارت کا کہنا ہے کہ ایک عمرہ کی پابندی کا مقصد دوسروں لوگوں کے لیے آسانی فراہم کرنا ہے تاکہ اطیمنان کے ساتھ عمرہ ادا کیا جا سکے۔
وزارت کی جانب سے مزید کہا گیا کہ عمرے کی مقررہ تاریخ اور وقت میں ترمیم کی گنجائش سسٹم میں موجود نہیں ہے، جو لوگ نسک ایپ کے ذریعے عمرہ پرمٹ جاری کروائیں گے اگر وہ اس میں ترمیم کرنا چاہتے ہوں تو انہیں پرمٹ منسوخ کروانا ہوگا۔
وزارت کا کہنا ہے کہ منسوخی کی کارروائی پرمٹ کا وقت شروع ہونے سے قبل ہی کروائی جا سکتی ہے، منسوخ کرنے کے بعد نیا پرمٹ جاری کروایا جائے۔