اسلام آباد : بانی پی ٹی آئی کے طبی معائنہ کیلئے علی امین گنڈاپور نے اسلام آباد ہائیکورٹ سے رجوع کرلیا۔
تفصیلات کےمطابق وزیر اعلیٰ خیبرپختونخوا علی امین گنڈاپور نے بانی پاکستان تحریک انصاف کے طبی معائنے کے لیے عدالت سے رجوع کر لیا۔
اسلام آباد ہائیکورٹ میں دائر درخواست میں پنجاب حکومت، آئی جی جیل خانہ جات، جیل اسپتال اور شوکت خانم اسپتال کو فریق بنایا گیا ہے۔
درخواست عمران خان اور علی امین گنڈاپور کی جانب سے وکیل راجہ ظہور الحسن نے دائر کی۔
درخواست میں مؤقف اختیار کیا گیا ہے کہ عمران خان کی عمر 72 سال ہے، اس لیے معمول کا طبی معائنہ ضروری ہے، جیل میں رہائش کے دوران ان کا وزن کم ہو چکا ہے اور مختلف بیماریوں میں مبتلا ہونے کا خدشہ ہے۔
درخواست میں مزید کہا گیا کہ بانی پی ٹی آئی کی مکمل میڈیکل ہسٹری شوکت خانم اسپتال کے پاس موجود ہے، لہٰذا اسپتال کی طبی ٹیم کو ماہانہ معائنہ اور ضروری ٹیسٹ کرنے کی اجازت دی جائے۔