لاہور: چیئرمین پی ٹی آئی عمران خان کا کہنا ہے کہ قانون کو پس پشت ڈال کر فسطائی حکومت نے مارشل لا کو بھی پیچھے چھوڑ دیا ہے۔
اے آر وائی نیوز کے مطابق چیئرمین پی ٹی آئی عمران خان نے معیشت کی بگڑتی صورت حال پر تشویش کا اظہار کرتے ہوئے کہا کہ یہ فسطائی حکومت پی ٹی آئی کو کچلنے کے ایک نکاتی ایجنڈےے پر کاربند ہے۔
انہوں نے کہا کہ ملکی معیشت اوندھے منہ تباہی کی گہری کھائی میں گرتی جارہی ہے، اوپن مارکیٹ میں ڈالر 315 روپے میں فروخت ہورہا ہے، سرکاری اور اوپن مارکیٹ کے نرخ میں تیس روپے فی ڈالر کا فرق ہے۔
قانون کی حکمرانی کو پوری طرح پسِ پشت ڈالتے ہوئے یہ فسطائی حکومت جنرل مشرف کے مارشل لاء کو کہیں پیچھے چھوڑتے ہوئے، تحریک انصاف کو کچلنے کے یک نکاتی ایجنڈے پر کاربند ہے۔
اس دوران ملکی معیشت اوندھے منہ تباہی کی گہری کھائی میں گرتی جارہی ہے۔ اوپن مارکیٹ میں ڈالر 315 روپے میں فروخت…
— Imran Khan (@ImranKhanPTI) May 29, 2023
عمران خان نے کہا کہ ملک میں مقامی یا غیرملکی سرمایہ کاری ناپید ہے، سرمایہ کاری نہ آنے سے جی ڈی پی میں شدید سکڑاؤ پیدا ہوگا۔
چیئرمین پی ٹی آئی نے کہا کہ سرمایہ کاری نہ آنے سے معیشت کو شدید دھچکا پہنچے گا اور ملک نہایت بلند افراط زر، مہنگائی کے چنگل میں پھنسے گا۔
انہوں نے مزید کہا کہ پی ڈی ایم رہنماؤں کے اربوں ڈالرز بیرون ملک ہیں یہ قابل فہم ہے کہ کیوں انہیں معیشت کی تباہی رتی بھر فکر نہیں ہے۔