اسلام آباد: اڈیالہ جیل میں قید سابق وزیر اعظم و سربراہ پاکستان تحریک انصاف (PTI) نے چیف جسٹس پاکستان قاضی فائز عیسیٰ کو خط لکھ دیا۔
خط میں سابق وزیر اعظم نے چیف جسٹس پاکستان سے شہریوں کے بنیادی حقوق کے تحفظ کا مطالبہ کرتے ہوئے کہا کہ پارٹی سے وابستہ رہنماؤں کو انتقام کا نشانہ اور جبری گمشدہ کیا جا رہا ہے۔
سربراہ پی ٹی آئی نے لکھا کہ بڑی تعداد میں لوگوں کی سیاسی وفاداریاں زبردستی تبدیل کروائی جا رہی ہیں۔ انہوں نے مطالبہ کیا کہ ضمانت کے باوجود سیاستدانوں کی گرفتاریوں کو روکا جائے۔
خط میں چیف جسٹس قاضی فائز عیسیٰ سے مطالبی کیا گیا کہ سیاستدانوں کی جبری گمشدگیوں پر کمیشن قائم کیا جائے۔
سابق وزیر اعظم نے کہا کہ پی ٹی آئی امیدواروں کو الیکشن مہم کی اجازت دی جائے، وفاقی، صوبائی حکومتوں اور الیکشن کمیشن کو الیکشن مہم کی اجازت کا حکم دیا جائے۔
انہوں نے کہا کہ پیمرا کو حکم دیا جائے دیگر جماعتوں کی طرح پی ٹی آئی کو بھی میڈیا کوریج فراہم کی جائے، سیاستدانوں کی جبری گمشدگیوں سے متعلق پٹیشن دائر کی گئی، خط کو آئین کے آرٹیکل 184 (3) کے تحت پٹیشن کے طور پر لیا جائے۔