دبئی: آئی سی سی نے ٹیسٹ کرکٹ کی نئی رینکنگ جاری کردی جس کے مطابق بھارتی ٹیم آسٹریلیا کو شکست دے کر پہلے نمبر پر پہنچ گئی ہے۔
آئی سی سی کی جانب سے جاری کردہ رینکنگ کے مطابق بھارتی ٹیم پہلے نمبر پر براجمان ہے اس کے ساتھ ہی بھارتی ٹیم تینوں فارمیٹ کی نمبر ون ٹیم بن گئی ہے۔
بھارت نے چار ٹیسٹ میچز کی سیریز کے پہلے میچ میں آسٹریلیا کو اننگ اور 132 رنز سے شکست دی تھی۔
واضح رہے کہ یہ پہلی بار ہے کہ بھارتی کرکٹ ٹیم تینوں فارمیٹ میں پہلے نمبر پر پہنچی ہے تاہم بھارت کو آسٹریلیا کے خلاف دوسرے ٹیسٹ میں کامیابی حاصل کرنی ہوگی شکست کی صورت میں بھارتی ٹیم دوسرے نمبر پر پہنچ جائے گی۔
یاد رہے کہ گزشتہ ماہ بھارت نے ون ڈے سیریز میں سری لنکا کو وائٹ واش کیا تھا، ہوم سیریز میں روہت شرما الیون نے نیوزی لینڈ کو بھی تین صفر سے شکست دی تھی۔
