واشنگٹن: سکھ فار جسٹس کے رہنما گرپتونت سنگھ پنوں نے الزام لگایا ہے کہ بھارت نے سفارت خانوں کو دہشت گردی کے اڈوں میں تبدیل کر دیا ہے۔
تفصیلات کے مطابق سکھوں کی عالمی تنظیم ’سکھ فار جسٹس‘ کے رہنما گرپتونت سنگھ پنوں نے کہا ہے کہ بھارت نے امریکا سمیت دنیا بھر میں اپنے سفارتخانوں کو دہشتگردی اور جاسوسی کے اڈوں میں تبدیل کر دیا ہے۔
واشنگٹن کے نیشنل پریس کلب میں ایک پریس کانفرنس سے خطاب کرتے ہوئے سکھ رہنما کا کہنا تھا کہ امریکا میں بھارتی سفارت خانہ قتل کی سازشوں کے کمانڈ سینٹر میں تبدیل ہو گیا ہے۔
پاک امریکا تعلقات سے بھارت کو پریشانی کا سامنا ہے، بلومبرگ
انھوں نے کہا صدر ڈونلڈ ٹرمپ نے بھارت کی سرحد پار دہشت گردی کا جواب ٹیرف بم سے دیا ہے، صدر ٹرمپ کا شکریہ ادا کرنے کے لیے 17 اگست کو واشنگٹن میں ایک دعائیہ تقریب کا اہتمام کیا جائے گا، جس کے بعد خالصتان ریفرنڈم کی ووٹنگ کا آغاز ہوگا۔
اس موقع پر خالصتان کونسل کے صدر ڈاکٹر بخشیش سنگھ کا کہنا تھا کہ خالصتان ریفرنڈم کا سوال 17 اگست کو واشنگٹن ڈی سی میں گونجے گا، ہر ووٹ بھارت کے پنجاب پر قبضے کے خلاف ایک ضرب ہوگا۔