وزیرخارجہ بلاول بھٹو کے دورہ بھارت سے متعلق اہم پیش رفت ہوئی ہے۔
بھارتی سول ایوی ایشن نے پاکستان سول ایوی ایشن اتھارٹی سے رابطہ کر کے بلاول بھٹو کے طیارے کو گووا کیلئے فضائی حدود اور روٹ دے دیا۔
ذرائع کے مطابق وزیر خارجہ کل صبح 11 بجے خصوصی طیارے سے بھارت روانہ ہوں گے جس کے لیے پاکستان سول ایوی ایشن اتھارٹی نے انتظامات مکمل کر لیے ہیں۔
بلاول بھٹو خصوصی طیارے میں کراچی سے براہ راست گووا انٹرنیشنل ایئرپورٹ لینڈ کریں گے۔
وزیرخارجہ بھارت میں شنگھائی کوآپریشن آرگنائزیشن اجلاس میں شرکت کیلئے کل روانہ ہوں گے۔ ذرائع کا کہنا ہے کہ سیکرٹری خارجہ اسد مجید خان، ترجمان دفتر خارجہ اور وزارت خارجہ کے حکام بھی وزیر خارجہ کے ہمراہ ہوں گے۔
ذرائع کے مطابق وزیر خارجہ بلاول بھٹوایس سی اواجلاس کےبعد 5 مئی کو وطن واپس آئیں۔
یاد رہے ترجمان دفتر خارجہ ممتاز زہرا بلوچ نے دورہ بھارت کے حوالے سے بتایا تھا کہ بلاول زرداری بھارت میں دورے کے دوران سائیڈ لائن ملاقاتیں بھی کریں گے ، ایس سی او اجلاس آئندہ ماہ بھارتی شہر گوا میں منعقد ہوگا، بھارتی وزیر خارجہ ایس سی او سمٹ کیلئے تمام ممبر ممالک کو دعوت دی تھی۔
ممتاز زہرا بلوچ کا کہنا تھا کہ پاکستان شنگھائی تعاون تنظیم سے دیرینہ وابستگی کے باعث اجلاسوں میں شرکت کرتا ہے، تنظیم کا موسمیاتی تحفظ بارے چوتھا وزارتی اجلاس نئی دہلی میں آن لائن منعقد ہوا۔