پاک بھارت ٹاکرا، آئی سی سی مکی آرتھر کے الزام کا جائزہ لے گا

ورلڈ کپ میں بھارت سے شکست کے بعد پاکستان ٹیم کے ڈائریکٹر مکی آرتھر نے اسے بی سی سی آئی ایونٹ قرار دیا تھا جس پر آئی سی سی نے اس الزام کا جائزہ لینے کا فیصلہ کیا ہے۔

کرکٹ ویب سائٹ کرک انفو کی رپورٹ میں دعویٰ کیا گیا ہے کہ انٹرنیشل کرکٹ کونسل ورلڈ کپ میں پاکستان اور بھارت کے میچ کے حوالے سے گرین شرٹس کے ٹیم ڈائریکٹر مکی آرتھر کے بیان کا جائزہ لے گا۔

ویب سائٹ نے آئی سی سی چیئرمین گریگ بارکلے کے حوالے سے کہا کہ جو بھی ایونٹ منعقد کرتے ہیں، انہیں ہمیشہ تنقید کا نشانہ بنایا جاتا ہے۔

آئی سی سی چیئرمین نے مزید کہا کہ ہم ہمیشہ چیزوں کو بہتر کرنے کی کوشش کرتے ہیں، یہ صرف ایونٹ کا آغاز ہے، آگے دیکھیے کہ چیزیں کیسی چلتی ہیں۔

اُن کا کہنا تھا کہ ہم جائزہ لیں گے کہ کیا بہتر کیا جا سکتا ہے، میں مطمئن ہوں کہ یہ ایک غیر معمولی ورلڈکپ ہو گا۔

واضح رہے کہ گزشتہ ہفتے کے روز احمد آباد کے نریندر مودی اسٹیڈیم میں بھارت نے پاکستان کو با آسانی 7 وکٹوں سے زیر کر لیا تھا۔