کیرالہ : قربانی کے نام پر خواتین کو قتل کرنے والے توہم پرست میاں بیوی نے ان کا گوشت بھی پکا کر کھالیا، پولیس نے سفاک ملزمان کو ساتھی سمیت گرفتار کرلیا۔
بھارت میں سفاکانہ طریقے سے کیے گئے دہرے قتل کا ہولناک واقعہ پیش آیا ہے جس میں قاتلوں نے دولت حاصل کرنے کیلئے دو خواتین کو بے دردی سے قتل کرکے ان کا گوشت بھی کھالیا۔
بھارتی میڈیا کے مطابق ریاست کیرالہ میں گوشت خور میاں بیوی نے جلد امیر بننے کی خواہش رکھنے والی خواتین کو مذہبی رسومات کی آڑ میں بے دردی سے قتل کرکے ان کے جسم کے 56 ٹکڑے کردیے اور گوشت بھی کھا لیا۔
قاتل میاں بیوی نے پولیس تفتیش کے دوران سنسنی خیز انکشاف کیے اور بتایا کہ محمد شفیع نامی شخص جس نے جادوگر کا روپ دھار کر ان سے کہا کہ وہ بہترین صحت اور لمبی عمر کے لیے قتل کئے گئے افراد کے جسم کے اعضاء پکا کر کھائیں۔
بھارتی پولیس کے مطابق گوشت خور جوڑے نے پہلے ان دونوں خواتین کو رسیوں سے باندھا اور پھر ان کا گلہ گھونٹ کر انہیں پھانسی پر لٹکا دیا۔
سفاک ملزمان نے پہلے ایک خاتون کی چھاتی کاٹی اور خون کو بہنے دیا گیا اور پھر اس کے 56 ٹکڑے کر دیے جبکہ دوسری خاتون پر چھریوں سے وار بھی کیے گئے، خواتین کی لاشیں تین مختلف گڑہوں سے برآمد ہوئیں۔
پولیس کے مطابق بہیمانہ قتل کی اس واردات کو اس جوڑے نے قربانی سمجھ کر کیا تاکہ وہ جلدی دولت مند بن جائیں اور ان کی صحت بھی بہتر رہے۔