مہنگائی کی شرح میں اضافے کا سلسلہ تھم نہ سکا

اسلام آباد: پاکستان میں مہنگائی کی شرح مزید 0.78 فیصد بڑھ گئی جس کے بعد سالانہ بنیادوں پر اس کی شرح 27.57 فیصد ریکارڈ کی گئی۔

ادارہ شماریات کی جانب سے جاری کردہ رپورٹ کے مطابق ملک میں حالیہ ہفتے 32 اشیا کی قیمتوں میں اضافہ ریکارڈ کیا گیا، چینی 5 روپے 94 پیسے فی کلو مہنگی ہو کر اس کی اوسط قیمت 153 روپے 83 پیسے فی کلو ہوئی۔

رپورٹ کے مطابق سرخ مرچ کا 200 گرام پیکٹ 28 روپے 17 پیسے مہنگا ہوا جبکہ چاول 11 روپے 73 پیسے اور فی کلو لہسن 20 روپے فی کلو مہنگے ہوئے۔

چکن 11 روپے 85 پیسے فی کلو، دال ماش 13 روپے 2 پیسے فی کلو، دال مونگ 5 روپے 65 پیسے فی کلو، انڈے 5 روپے 26 پیسے فی درجن، دال مسور 2 روپے 78 پیسے فی کلو مہنگے ہوئے۔

کیلے، گڑ، آلو، دال چنا، بیف اور مٹن کی قیمتوں میں بھی اضافہ ریکارڈ کیا گیا۔

ایک ہفتے میں 7 اشیا کی قیمتوں میں کمی ریکارڈ کی گئی۔ ٹماٹر 19 روپے 12 پیسے فی کلو سستے ہوئے، اڑھائی کلو گھی کا ٹن 12 روپے 27 پیسے سستا ہوا۔

ادارہ شماریات کے مطابق حالیہ ہفتے 12 اشیائے ضروریہ کی قیمتوں میں استحکام رہا۔