وزارت داخلہ نے پی او آر کارڈ ہولڈرز غیرملکیوں کی واپسی سے متعلق فیصلہ کرلیا ہے۔
اے آر وائی نیوز کے مطابق پروف آف رجسٹریشن کارڈ ہولڈرز کی وطن واپسی سے متعلق نوٹیفکیشن جاری کردیا گیا ہے جس کے مطابق پی او آر کارڈ ہولڈرز کی رضاکارانہ واپسی کا عمل فوری شروع کیا جارہا ہے، افغان شہریوں کی وطن واپسی کا عمل یکم ستمبر سے شروع ہوگا۔
وزارت داخلہ کا کہنا ہے کہ فیصلہ سیکیورٹی خدشات، وسائل پر بڑھتے دباؤ کی وجہ سے کیا گیا، افغان عبوری حکومت، یو این ایچ سی آر دیگر کے ساتھ تعاون کیا جائے گا۔
وزارت امور کشمیر، جی بی و سیفران پی او آر ہولڈرز کا ڈیٹا کمیٹیوں کو فراہم کرے گی، نادرا واپس جانے والوں کی رجسٹریشن ختم کرنے کے انتظامات کرے گا اور ایف آئی اے نامزد بارڈر کراسنگ پوائنٹس پر سہولت فراہم کرے گا۔
نوٹیفکیشن کے مطابق صوبائی حکومتوں، متعلقہ ایجنسیوں کو کہا گیا ہے کہ وہ مکمل میپنگ کریں، صوبائی ایکشن پلان تشکیل دے کر وزارت داخلہ سے شیئر کیا جائے۔
وزارت داخلہ کا کہنا ہے کہ جلاوطن افراد کے لیے ٹرانزٹ ایریاز کا تعین، نقل و حمل، مالی معاونت کا بندوبست کیا جائے، ضلعی و صوبائی سطح پر کمیٹیاں تشکیل دی جائیں، کنٹرول رومز کو دوبارہ فعال کیا جائے گا۔
علاوہ ازیں شکایات کے ازالے کے لیے ہاٹ لائن اور شکایتی سیل قائم کیا جائے گا، وطن واپسی کی روزانہ پیشرفت کی نگرانی فارن نیشنل سیکیورٹی ڈیش بورڈ کرے گا، اسٹیک ہولڈرز اپنے فوکل پرسنز کی تازہ ترین تفصیلات وزارت داخلہ سے شیئر کریں۔
وزارت داخلہ نے رابطہ کاری کے لیے سیکشن آفیسر سیکیورٹی کو فوکل پرسن مقرر کردیا ہے۔