اسلام آباد (20 اگست 2025): پاکستان کی کامیاب سفارتکاری سے پاک امریکا تعلقات نئی بلندیوں تک پہنچ گئے۔
تفصیلات کے مطابق پاکستان اور امریکا کے تعلقات میں فیلڈ مارشل سید عاصم منیر کی کامیاب ڈپلومیسی کا پوری دنیا اعتراف کر رہی ہے، اسی سلسلے میں بین الاقوامی جریدے واشنگٹن پوسٹ نے بھی پاکستان کی حالیہ سفارت کاری مہم کو بہترین قرار دے دیا ہے۔
واشنگٹن پوسٹ نے لکھا فیلڈ مارشل عاصم منیر کے دورہ امریکا کو تعلقات میں "ایک نئی جہت کی علامت "قرار دیا جارہا ہے، ٹرمپ کے دوبارہ امریکی صدر منتخب ہونا پاکستان کیلئے چیلنج سمجھا جارہا تھا لیکن بدلتے عالمی حالات میں پاکستانی حکام نے وائٹ ہاؤس کے ساتھ قریبی تعلقات کو فروغ دیا۔
امریکا نے انسداد دہشت گردی کے خلاف پاکستانی اقدامات کی تعریف کی، پاکستانی کامیاب سفارتکاری کی بدولت کالعدم تنظیم بی ایل کو امریکا نے عالمی دہشت گرد تنظیم قرار دیا، پاکستان نے امریکا کو کرپٹو کے منصوبوں اور معدنیات کی ترقی میں شراکت کی پیشکش کی۔
امریکی اخبار نے لکھا کہ صدر ٹرمپ نے پاکستان میں مختلف شعبوں میں سرمایہ کاری میں دلچسپی کا اظہار کیا، بھارت سے جنگ بندی کے بعد پاک امریکا تعلقات میں مزید تیزی آئی۔