اسلام آباد: کیمبرج امتحان میں پیپر لیک ہونے کی تحقیقاتی رپورٹ قومی اسمبلی کی قائمہ کمیٹی برائے وفاقی تعلیم و پیشہ ورانہ تربیت کو پیش کر دی گئی۔

تفصیلات کے مطابق کیمبرج امتحانات میں پیپر لیک ہونے کے معاملے پر تحقیقات مکمل کر لی گئی ہیں اور سب کمیٹی نے 30 نکات پر مشتمل رپورٹ قومی اسمبلی کی قائمہ کمیٹی برائے وفاقی تعلیم و پیشہ ورانہ تربیت کو پیش کر دی۔

سیکرٹری ایجوکیشن نے بریفنگ میں بتایا کہ پیپر لیک کی تحقیقات کیمبرج نے خود کی ہیں اور اس معاملے میں انٹر بورڈ کمیٹی آف چیئرمینز (آئی بی سی سی) کا کردار بھی یقینی بنایا گیا ہے۔

ان کا کہنا تھا کہ بیرونِ ملک داخلہ لینے والے طلبہ دوبارہ امتحان دینے کے متحمل نہیں ہو سکتے، اس لیے معاملے کو احتیاط سے دیکھنا ہوگا۔

سیکرٹری ایجوکیشن نے مزید کہا کہ دو ہفتوں میں اجلاس بلایا جائے گا، جس میں کیمبرج اور آئی بی سی سی دونوں کو ساتھ بٹھایا جائے گا تاکہ آئندہ اس طرح کے مسائل سے بچا جا سکے۔

مزید پڑھیں : جون 2025 میں کیمبرج کے لیک ہونے والے پیپرز کے حوالے سے طلبا کے لیے اہم خبر

کمیٹی کے رکن مہتاب اکبر راشدی نے کہا کہ کیمبرج کو کنٹرول کرنا مناسب نہیں، وہ اپنی غلطیاں خود تلاش کرے گا، کمیٹی کی جانب سے ایسے اقدامات تجویز کیے جائیں گے جن سے طلبہ کے تعلیمی مستقبل کو نقصان نہ ہو۔

یاد رہے کیمبرج انٹرنیشنل نے جون 2025 کے امتحانات میں مبینہ پیپر لیکس کے معاملے پر متاثرہ تین پرچوں کے لیے مفت ری سیٹ کا اعلان کیا تھا۔

کیمبرج انٹرنیشنل کا کہنا تھا کہ متاثرہ پرچوں میں شریک طلبہ نومبر 2025 میں دوبارہ امتحان دے سکیں گے، جبکہ نومبر کے امتحانات کے نتائج معمول کے مطابق جنوری میں جاری کیے جائیں گے۔

کیمبرج نے مزید کہا تھا کہ ری سیٹ اختیاری ہوگا اور اس سے متعلق مزید تفصیلات نتائج کے اجرا کے بعد اسکولوں کو فراہم کی جائیں گی تاہم پرائیویٹ امیدواروں کے لیے رجسٹریشن کا طریقہ کار برٹش کونسل جاری کرے گی۔